Drug Smuggling Attempt in Kuwait: കുവൈത്ത് വിമാനത്താവളത്തിൽ 4,255 മയക്കുമരുന്ന് ഗുളികകൾ പിടികൂടി

കുവൈത്ത് സിറ്റി: കുവൈത്ത് അന്താരാഷ്ട്ര വിമാനത്താവളത്തിൽ മയക്കുമരുന്ന് ഗുളികകൾ കടത്താൻ ശ്രമിച്ച സംഭവത്തിൽ കസ്റ്റംസ് ഉദ്യോഗസ്ഥർ 4,255 ക്യാപ്റ്റഗൺ ഗുളികകൾ പിടികൂടി. ജസീറ എയർവേയ്സിന്‍റെ ടെർമിനൽ 5-ൽ നടത്തിയ പരിശോധനയിലാണ് ഈ മയക്കുമരുന്നുകൾ കണ്ടെത്തിയത്. സിറിയയിൽ നിന്നുള്ള ഒരു യാത്രക്കാരന്റെ ലഗേജിൽ ഒളിപ്പിച്ച നിലയിൽ ഇവ കണ്ടെത്തിയതായി അധികൃതർ അറിയിച്ചു. യാത്രക്കാരന്റെ ബാഗേജിൽ സംശയം തോന്നിയതിനെ തുടർന്ന്, സ്കാനിംഗ് ഉപകരണങ്ങൾ ഉപയോഗിച്ച് വിശദമായ പരിശോധന നടത്തുകയായിരുന്നു. പരിശോധനയിൽ വ്യക്തിപരമായ സാധനങ്ങൾക്കിടയിൽ ഒളിപ്പിച്ച മൂന്ന് പെട്ടികളിൽ ക്യാപ്റ്റഗൺ ഗുളികകൾ കണ്ടെത്തിയതായി ജനറൽ അഡ്മിനിസ്ട്രേഷൻ ഓഫ് കസ്റ്റംസ് അറിയിച്ചു.

ഈ സംഭവത്തെ തുടർന്ന്, പ്രതിക്കെതിരെ നിയമനടപടികൾ ആരംഭിക്കുകയും, പിടിച്ചെടുത്ത ലഹരിമരുന്നിനൊപ്പം ഇയാളെ ജനറൽ ഡിപ്പാർട്ട്മെന്റ് ഫോർ ഡ്രഗ് കൺട്രോളിന് കൈമാറുകയും ചെയ്തു. കസ്റ്റംസ് അധികൃതർ, രാജ്യത്തിന്റെ സുരക്ഷയും പൊതുസുരക്ഷയും ഉറപ്പാക്കുന്നതിനുള്ള പ്രതിബദ്ധതയിൽ, അതിര്‍ത്തി പ്രവേശന കേന്ദ്രങ്ങളിലെ പരിശോധനയും നിരീക്ഷണവും കൂടുതൽ ശക്തമാക്കുമെന്ന് അറിയിച്ചു. ലഹരിമരുന്ന് കടത്താൻ ശ്രമിക്കുന്നവരെ തടയുന്നതിനുള്ള നടപടികൾ തുടരുമെന്നും അധികൃതർ വ്യക്തമാക്കി.