Artificial Intelligence Lab Launched: നിര്മ്മിതബുദ്ധി ജനസേവനത്തിന്; സി-ഡിറ്റ് ആര്ട്ടിഫിഷ്യല് ഇന്റലിജന്സ് ലാബ് ഒരുങ്ങി, മലയാളം കേന്ദ്രീകരിച്ചുള്ള ദ്വിഭാഷാ എഐ സംവിധാനങ്ങൾ വരുന്നു
തിരുവനന്തപുരം: സര്ക്കാര് സേവനങ്ങള്ക്കും പൊതുഭരണ സംവിധാനങ്ങള്ക്കും നിര്മ്മിതബുദ്ധിയുടെ സാധ്യതകള് പ്രയോജനപ്പെടുത്തുക എന്ന ലക്ഷ്യത്തോടെ സെന്റര് ഫോര് ഡെവലപ്
തിരുവനന്തപുരം: സര്ക്കാര് സേവനങ്ങള്ക്കും പൊതുഭരണ സംവിധാനങ്ങള്ക്കും നിര്മ്മിതബുദ്ധിയുടെ സാധ്യതകള് പ്രയോജനപ്പെടുത്തുക എന്ന ലക്ഷ്യത്തോടെ സെന്റര് ഫോര് ഡെവലപ്മെന്റ് ഓഫ് ഇമേജിങ് ടെക്നോളജി (സി-ഡിറ്റ്) ആരംഭിക്കുന്ന ആര്ട്ടിഫിഷ്യല് ഇന്റലിജന്സ് ലാബ് യാഥാര്ഥ്യമാകുന്നു. പട്ടത്തുള്ള സി-ഡിറ്റ് ഐസിടി കോംപ്ലക്സിലാണ് ലാബ് തയ്യാറാക്കിയിട്ടുള്ളത്. സര്ക്കാര് സേവനങ്ങളെ കൂടുതല് കാര്യക്ഷമവും ജനസൗഹൃദവുമാക്കുന്നതിനായി മലയാളം കേന്ദ്രീകരിച്ചുള്ള ദ്വിഭാഷാ എഐ സംവിധാനങ്ങളാണ് സി-ഡിറ്റ് വികസിപ്പിക്കുന്നത്. ആദ്യമായാണ് രാജ്യത്ത് ഒരു സംസ്ഥാനത്ത് നിര്മ്മിതബുദ്ധി സാങ്കേതികവിദ്യക്ക് വേണ്ടി ഒരു വകുപ്പും മന്ത്രിയുമുണ്ടാകുന്നത്. മന്ത്രി പി.കെ. കുഞ്ഞാലിക്കുട്ടിയുടെ നേതൃത്വത്തിലുള്ള നിര്മ്മിതബുദ്ധി വകുപ്പിന്റെ ആദ്യ ചുവടുവെപ്പുകളിലൊന്നാണ് ആര്ട്ടിഫിഷ്യല് ഇന്റലിജന്സ് ലാബ്.
മലയാളത്തിലും ഇംഗ്ലീഷിലും സംസാരിക്കാനും കേള്ക്കാനും വിവരങ്ങള് മനസ്സിലാക്കി മറുപടി നല്കാനും കഴിയുന്ന സംവിധാനങ്ങള്, ഔദ്യോഗികവും സ്ഥിരീകരിക്കപ്പെട്ടതുമായ സര്ക്കാര് വിവരങ്ങളെ അടിസ്ഥാനമാക്കി ഉത്തരങ്ങള് നല്കുന്ന സാങ്കേതികവിദ്യ, ശബ്ദത്തെ എഴുത്തായും എഴുത്തിനെ സ്വാഭാവിക ശബ്ദമായും മാറ്റുന്ന സംവിധാനം എന്നിവ സി-ഡിറ്റിന്റെ നിര്മ്മിതബുദ്ധി സംരംഭങ്ങളുടെ സവിശേഷതകളാണ്. നിക്ഷേപവും തൊഴിലും, പൗരസേവനം, വയോജന പരിചരണവും സുരക്ഷയും, ഭരണവും നിയമനിര്വ്വഹണവും, പഠനവും നൈപുണ്യ വികസനവും ഉള്പ്പെടെയുള്ള മേഖലകളില് പ്രയോജനപ്പെടുത്താവുന്ന എഐ സംവിധാനങ്ങള് ഇതിനോടകം സി-ഡിറ്റ് വികസിപ്പിച്ചിട്ടുണ്ട്.
