Leading the Charge: സച്ചിൻ ബേബി, അസറുദ്ദീൻ, ജലജ് സക്സേന; ആദ്യ കിരീടം ലക്ഷ്യമിട്ട് ആലപ്പി റിപ്പിൾസ്

ആലപ്പുഴ: കേരള ക്രിക്കറ്റ് ലീഗിന്റെ പുതിയ സീസൺ അടുത്തെത്തി നിൽക്കുമ്പോൾ, കിരീടം നേടാനുള്ള ലക്ഷ്യത്തോടെ ആലപ്പി റിപ്പിൾസ് ശക്തമായ ഒരു ടീമിനെ സജ്ജമാക്കിയിട്ടുണ്ട്. സച്ചിൻ ബേബി, മുഹമ്മദ് അസറുദ്ദീൻ, ജലജ് സക്സേന എന്നിവരടങ്ങുന്ന പരിചയസമ്പന്നരോടൊപ്പം യുവപ്രതിഭകളും ടീമിൽ ഉൾപ്പെടുത്തിയിട്ടുണ്ട്. കേരളത്തിലെ മുൻ താരം നിഖിലേഷ് സുരേന്ദ്രന്റെ പരിശീലനത്തിൽ, ആലപ്പി ഈ സീസണിൽ എതിരാളികൾക്ക് വലിയ വെല്ലുവിളി നൽകുമെന്ന് പ്രതീക്ഷിക്കുന്നു. കഴിഞ്ഞ സീസണുകളിൽ മികവുറ്റ പ്രകടനം കാഴ്ചവച്ച സച്ചിൻ ബേബി, ഈ തവണ ആലപ്പിയുടെ നായകനായി എത്തുന്നു. ബാറ്റിംഗിലും ക്യാപ്റ്റൻസിയിലും തിളങ്ങുന്ന സച്ചിൻ, കെസിഎൽ ആദ്യ സീസണിൽ രണ്ട് സെഞ്ചുറികളോടെ ടോപ്പ് സ്‌കോററായിട്ടുണ്ടായിരുന്നു. കേരളത്തിന് വിവിധ ഫോർമാറ്റുകളിലായി പതിനായിരത്തിലധികം റൺസ് നേടിയ ഏക താരമായ സച്ചിൻ, കെസിഎല്ലിൽ ഏറ്റവും കൂടുതൽ റൺസ് നേടിയ താരമായി മാറിയിട്ടുണ്ട്. കഴിഞ്ഞ സീസണുകളിൽ ടീമിന് തിരിച്ചടിയായത് മുൻനിര ബാറ്റിങ് അവസരങ്ങൾ നഷ്ടമായതുകൊണ്ടാണ്. അതിനാൽ, ഈ തവണ, സച്ചിൻ ബേബി, അസറുദ്ദീൻ, ജലജ് സക്സേന എന്നിവരുടെ സാന്നിധ്യം ബാറ്റിങ് നിരയെ ശക്തമാക്കും. ഇവർ മൂവരും ചേർന്ന് ഒരു വർഷം മുമ്പ് കേരളത്തെ രഞ്ജി ട്രോഫിയുടെ ഫൈനലിൽ എത്തിച്ച സഖ്യമായിരുന്നു. ടി 20യിൽ മലയാളി താരമായ അസറുദ്ദീൻ 137 റൺസ് നേടിയതോടെ ഒരു റെക്കോർഡ് സ്വന്തമാക്കിയിട്ടുണ്ട്. ജലജ് സക്സേന, രഞ്ജി ട്രോഫിയിൽ മികച്ച ഓൾ റൗണ്ടർ എന്ന നിലയിൽ മൂന്ന് തവണ ലാല അമർനാഥ് പുരസ്കാരം നേടിയിട്ടുണ്ട്. ഇദ്ദേഹം ഐപിഎല്ലിൽ മുംബൈ ഇന്ത്യൻസ്, റോയൽ ചലഞ്ചേഴ്സ് ബാംഗ്ലൂർ, ഡൽഹി ക്യാപിറ്റൽസ്, പഞ്ചാബ് കിങ്സ് എന്നിവിടങ്ങളിൽ കളിച്ചിട്ടുണ്ട്.

ആലപ്പി റിപ്പിൾസിന്റെ മറ്റൊരു പ്രധാന സവിശേഷതയാണ് ടൂർണമെന്റിലെ മികച്ച ഓൾറൗണ്ടർമാരുടെ സാന്നിധ്യം. സിബിൻ ഗിരീഷ്, അഭിജിത് പ്രവീൺ, അക്ഷയ് ടി കെ, അമൽരാജ്, ആഷിഖ് അലി, വിനിൽ ടി എസ്, ശ്രീരൂപ് എം പി എന്നിവരടങ്ങുന്ന ബാറ്റിങ്, ബൗളിങ് നിരയും ശക്തമാണ്. 11.80 ലക്ഷം രൂപയുടെ റെക്കോർഡ് തുകയ്ക്കാണ് സിബിൻ ഗിരീഷിനെ ടീമിൽ ഉൾപ്പെടുത്തിയിരിക്കുന്നത്. എൻഎസ്കെ ട്രോഫിയിൽ മികച്ച ഫോമിലാണ് താരം. അഭിജിതിന്റെ സാന്നിധ്യം ടീമിന്റെ മധ്യനിരയ്ക്കും ബൗളിങ്ങിനും കൂടുതൽ സ്ഥിരത നൽകും. എൻഎസ്കെ ട്രോഫിയിൽ മികച്ച പ്രകടനം കാഴ്ചവച്ച ആഷിഖ് അലിയാണ് മറ്റൊരു ശ്രദ്ധേയമായ താരമായി മാറുന്നത്. വിക്കറ്റുകൾ വീഴ്ത്താനും റൺറേറ്റ് നിയന്ത്രിക്കാനും ശേഷിയുള്ള മികച്ച ബൗളിംഗ് നിരയും ആലപ്പി റിപ്പിൾസിന് ഉണ്ട്. കഴിഞ്ഞ സീസണിൽ 12 വിക്കറ്റുകൾ വീഴ്ത്തിയ ജലജ് സക്സേനയുടെ പരിചയസമ്പത്ത് ടീമിന് സഹായകമാകും. പവർപ്ലേയിലും ഡെത്ത് ഓവറുകളിലും കൃത്യതയോടെ പന്തെറിയുന്ന അജയഘോഷ്, പേസ് നിരയിലെ ശ്രദ്ധേയമായ സാന്നിധ്യമാണ്. കഴിഞ്ഞ സീസണിൽ 13 വിക്കറ്റുകൾ നേടിയ താരം, അജിത് രാജ്, അഖിൽദേവ്, കെ അജിനാസ്, വിനിൽ ടി എസും ഉൾപ്പെടുന്ന ബൗളിംഗ് നിര, എതിരാളികളുടെ ബാറ്റിങ് നിരയെ തളയ്ക്കാൻ പ്രാപ്തമാണ്.