Search for Missing Elderly Woman:വടക്കനാട് കാണാതായ വയോധികയ്ക്കായി സംയുക്ത തിരച്ചിൽ തുടങ്ങി

സുൽത്താൻബത്തേരി: വടക്കനാട് പള്ളിവയലിൽ കാണാതായ ഗോത്രവയോധികയായ തങ്കിയെ (70) കണ്ടെത്തുന്നതിനായി സംയുക്ത തിരച്ചിൽ ആരംഭിച്ചു. കഴിഞ്ഞമാസം 30-മുതൽ കാണാതായ തങ്കി, ഉന്നതിയിലെ വീട്ടിൽ തനിച്ചായിരുന്നു താമസിച്ചിരുന്നത്. ഉന്നതിയിൽനിന്ന് അരക്കിലോമീറ്റർ അകലെയുള്ള ബന്ധുവീട്ടിൽ ഒരു ചടങ്ങിന് പോയതിനെ തുടർന്ന് അവർ കാണാതായി. ചടങ്ങിൽ പങ്കെടുക്കാൻ പോയവരെല്ലാം തിരിച്ചു വന്നെങ്കിലും തങ്കി വരാതിരുന്നതോടെ അവിടെ നിന്നുള്ളവർ ആശങ്കപ്പെടുകയും പിന്നീട് തിരച്ചിൽ ആരംഭിക്കുകയും ചെയ്തു. തങ്കിയുടെ മകൾ ബത്തേരി പോലീസിൽ പരാതി നൽകുകയും ചെയ്തു. തുടർന്ന്, സമീപ പ്രദേശങ്ങളിലും ഉന്നതികളിലും തിരച്ചിൽ നടത്തിയെങ്കിലും തങ്കിയെ കണ്ടെത്താൻ സാധിച്ചില്ല. എട്ടുദിവസം കഴിഞ്ഞിട്ടും കണ്ടെത്താനാകാത്തതിനെ തുടർന്ന് ശനിയാഴ്ച സംയുക്ത പരിശോധന ആരംഭിച്ചു. വീടിന് സമീപത്തും തോട്ടങ്ങളിലുമാണ് ജനപ്രതിനിധികളും നാട്ടുകാരും പോലീസും വനംവകുപ്പും ചേർന്ന് തിരച്ചിൽ നടത്തിയത്. പോലീസ് നായയുടെയും ഡ്രോണിന്റെയും സഹായത്തോടെ നടത്തിയ തിരച്ചിൽ ആദ്യദിവസം വൈകീട്ടോടെ അവസാനിപ്പിച്ചു. ജില്ലയിൽ മുഴുവൻ ട്രൈബൽ പ്രമോട്ടർമാരിലേക്ക് വിവരം കൈമാറി ഉന്നതികളിൽ അന്വേഷണം നടത്താൻ തീരുമാനിച്ചതായി അനിൽകുമാർ അറിയിച്ചു. തങ്കി അടുത്തൊരു വീട്ടിൽ അടിച്ചുവാരാൻ പോകാറുണ്ടായിരുന്നു. കാടുകളിലേക്കും മറ്റുള്ളവിടങ്ങളിലേക്കും പോകുന്ന സ്വഭാവക്കാരിയായിരുന്നില്ലെന്നും ഒരു അംഗം പറഞ്ഞു. വനമേഖല കൂടിയായതിനാൽ ഇത്രദിവസമായിട്ടും തങ്കിയെ കണ്ടെത്താനാവാത്തത് ആശങ്കയുണ്ടാക്കുന്നു.