Weather Forecast in Saudi Arabia: സൗദി അറേബ്യയിലെ വിവിധ മേഖലകളിൽ ശക്തമായ മഴയ്ക്ക് സാധ്യത

ജിദ്ദ: അടുത്ത ആഴ്ച അവസാനം വരെ സൗദി അറേബ്യയിലെ വിവിധ ഭാഗങ്ങളിൽ ഇടിമിന്നലോടുകൂടിയ മഴയ്ക്ക് സാധ്യതയുണ്ടെന്ന് ദേശീയ കാലാവസ്ഥാ കേന്ദ്രം (എൻസിഎം) അറിയിച്ചു. എൻസിഎം പുറത്തിറക്കിയ മഴയുടെ സാധ്യതാ ഭൂപടം പ്രകാരം, വെള്ളിയാഴ്ച പുലർച്ചെ മുതൽ നജ്റാന്റെ കിഴക്കൻ ഭാഗങ്ങളിലും കിഴക്കൻ പ്രവിശ്യയുടെ തെക്കൻ മേഖലകളിലും നേരിയതോ മിതമായതോ ആയ മഴ ലഭിക്കുമെന്ന് വ്യക്തമാക്കുന്നു. ഉച്ചയോടെ കിഴക്കൻ പ്രവിശ്യയുടെ തെക്കൻ ഭാഗങ്ങളിൽ നേരിയ മഴ തുടരും. വൈകുന്നേരത്തോടെ കിഴക്കൻ പ്രവിശ്യയിൽ മഴ കുറയുകയും നജ്റാനിലേക്ക് നീങ്ങുകയും ചെയ്യും. അതേസമയം, അസീർ, ജിസാൻ, മക്ക മേഖലകളുടെ തെക്കുപടിഞ്ഞാറൻ തീരപ്രദേശങ്ങളിൽ മിതമായ മഴ വ്യാപിക്കും. രാത്രി എത്തുമ്പോഴേക്കും പടിഞ്ഞാറൻ നജ്റാനും കിഴക്കൻ പ്രവിശ്യയുടെ തെക്കൻ ഭാഗങ്ങളിലും മാത്രം നേരിയ മഴ തുടരുമെന്നാണ് പ്രവചനം.

ശനിയാഴ്ച ഉച്ചയ്ക്ക് കിഴക്കൻ പ്രവിശ്യയുടെ തെക്കുപടിഞ്ഞാറൻ ഭാഗങ്ങളിലും നജ്റാന്റെ വടക്കൻ മേഖലകളിലും റിയാദ് മേഖലയിലെ തെക്കൻ മധ്യഭാഗങ്ങളിലും തെക്കുപടിഞ്ഞാറൻ തീരപ്രദേശങ്ങളിലുമായി നേരിയ മഴ ലഭിക്കും. പിന്നീട് ജിസാൻ, അസീർ, മക്ക മേഖലകളിലെ തായിഫ് എന്നിവിടങ്ങളിൽ മിതമായ മഴ ശക്തിപ്രാപിക്കും. റിയാദ്-ഖസീം അതിർത്തിയിലും ഇടയ്ക്കിടെ നേരിയ മഴ പ്രതീക്ഷിക്കുന്നു. ഞായറാഴ്ച ഉച്ചവരെ പൊതുവെ വരണ്ട കാലാവസ്ഥയായിരിക്കും. തുടർന്ന് കിഴക്കൻ ജിസാൻ, തെക്കൻ അസീർ മേഖലകളിൽ മിതമായതോ ശക്തമായതോ ആയ മഴയ്ക്കും, കിഴക്കൻ നജ്റാനും കിഴക്കൻ പ്രവിശ്യയുടെ തെക്കൻ ഭാഗങ്ങളിലും നേരിയ മഴയ്ക്കും സാധ്യതയുണ്ട്. വൈകുന്നേരത്തോടെ കിഴക്കൻ പ്രവിശ്യയിലേക്കും റിയാദ് മേഖലയിലേക്കും മഴ വ്യാപിക്കും.