Farewell to Rafeeq Pulikool: റഫീഖ് പുളിക്കൂലിന് കെഎംസിസി കോഴിക്കോട് ജില്ലാ കമ്മിറ്റി യാത്രയയപ്പ് നൽകി

ബഹ്‌റൈൻ: കെഎംസിസി ബഹ്‌റൈൻ കോഴിക്കോട് ജില്ലാ വർക്കിങ് കമ്മിറ്റി അംഗമായിരുന്ന റഫീഖ് പൊളിക്കൂലിന്, ബഹ്‌റൈനിൽ ജോലി അവസാനിപ്പിച്ച് സൗദിയിലേക്ക് പോകുന്നതിനോടനുബന്ധിച്ച്, കോഴിക്കോട് ജില്ലാ കമ്മിറ്റി ഹൃദയപൂർവ്വം യാത്രയയപ്പ് നൽകി. മനാമയിലെ കെഎംസിസി ഹാളിൽ നടന്ന ചടങ്ങിൽ ജില്ലാ-സംസ്ഥാന നേതാക്കളും വിവിധ മണ്ഡലങ്ങളിലെ ഭാരവാഹികളും പ്രവർത്തകരും പങ്കെടുത്തു. റഫീഖ് പുളിക്കൂലിന്റെ സേവനങ്ങൾക്കുള്ള ആദരവായി ഈ ചടങ്ങ് സംഘടിപ്പിച്ചു.

രാഷ്ട്രീയ, സാമൂഹിക, കായിക മേഖലകളിൽ സജീവമായിരുന്ന റഫീഖ്, തന്റെ ഉത്തരവാദിത്വങ്ങൾ ആത്മാർത്ഥതയോടെ നിർവഹിച്ച വ്യക്തിയായിരുന്നു. അദ്ദേഹത്തിന്റെ സത്യസന്ധതയും സേവനബോധവും സഹപ്രവർത്തകരുടെ ഇടയിൽ അദ്ദേഹത്തിന് വലിയ പ്രിയവും ആദരവുമുണ്ടാക്കിയിരുന്നു. കായിക രംഗത്ത് മികച്ച വോളിബോൾ താരമായ റഫീഖ്, യുവജനങ്ങൾക്ക് പ്രചോദനമായ പ്രവർത്തനങ്ങൾക്കു നേതൃത്വം നൽകുകയും ചെയ്തു.

ചടങ്ങിൽ കെഎംസിസി ബഹ്‌റൈൻ കോഴിക്കോട് ജില്ലാ പ്രസിഡന്റ് ഷാജഹാൻ പരപ്പൻ അധ്യക്ഷനായിരുന്നു. സംസ്ഥാന സെക്രട്ടറി ഫൈസൽ കോട്ടപ്പള്ളി ചടങ്ങ് ഉദ്ഘാടനം ചെയ്തു. കെഎംസിസി ബഹ്‌റൈൻ മുൻ കോഴിക്കോട് ജില്ലാ ജനറൽ സെക്രട്ടറി അഷ്‌റഫ് അഴിയൂർ, ജില്ലാ വൈസ് പ്രസിഡന്റ് മുഹമ്മദ് ഷാഫി വേളം, ജില്ലാ സെക്രട്ടറി മുനീർ ഒഞ്ചിയം, കോഴിക്കോട് ജില്ലാ ലേഡീസ് വിംഗ് പ്രസിഡന്റ് സുബൈദ പി.കെ.സി., ജെപികെ തിക്കോടി, നസീർ തുടങ്ങിയവർ ആശംസകൾ നേർന്നു. പരിപാടിക്ക് ജില്ലാ ഓർഗനൈസിംഗ് സെക്രട്ടറി നസീം പേരാമ്പ്ര നേതൃത്വം നൽകി. ജില്ലാ ജനറൽ സെക്രട്ടറി പി. കെ. ഇസ്ഹാഖ് സ്വാഗതവും, ജില്ലാ സെക്രട്ടറി മുഹമ്മദ് സിനാൻ നന്ദിയും രേഖപ്പെടുത്തി.