India to Compete in Global Markets:ആഗോള വിപണികളുമായി മത്സരിക്കാൻ ഇന്ത്യ; ഇറക്കുമതി തീരുവ 10 ശതമാനത്തിൽ താഴെയാക്കും

കേന്ദ്ര സർക്കാർ ആഗോള വിപണികളുമായി മത്സരക്ഷമത വർദ്ധിപ്പിക്കാൻ പുതിയ തന്ത്രങ്ങൾ നടപ്പിലാക്കാൻ തീരുമാനിച്ചിട്ടുണ്ട്. വരും വർഷങ്ങളിൽ ഇറക്കുമതി തീരുവ വൻതോതിൽ കുറയ്ക്കുമെന്ന് ധനമന്ത്രി നിർമല സീതാരാമൻ ഡൽഹിയിൽ നടന്ന എൻ.സി.എ.ഇ.ആർ ഇന്ത്യ പോളിസി ഫോറത്തിൽ പ്രസ്താവിച്ചപ്പോൾ, ആറ് വർഷത്തിനിടെ ആദായനികുതി, കോർപ്പറേറ്റ് നികുതി, ചരക്ക് സേവന നികുതി എന്നിവയിൽ നടപ്പാക്കിയ പരിഷ്‌കാരങ്ങളുടെ തുടർച്ചയായി ഈ നീക്കം വരുന്നതാണെന്നും അവർ പറഞ്ഞു. ഇന്ത്യയുടെ ഉത്പാദന മേഖലയ്ക്ക് ആവശ്യമായ അസംസ്‌കൃത വസ്തുക്കൾ കുറഞ്ഞ വിലയിൽ ലഭ്യമാക്കുന്നതിന്, ഇറക്കുമതി ചെലവ് കുറയ്ക്കാൻ നികുതി കുറയ്ക്കലുകൾ സഹായിക്കും. ഈ നീക്കങ്ങൾ ഇന്ത്യയെ ആഗോള നിർമാണ ഹബ്ബാക്കി മാറ്റാനുള്ള പദ്ധതിയുടെ നിർണായക ഘട്ടമാണെന്ന് വിലയിരുത്തപ്പെടുന്നു.

അടുത്ത സാമ്പത്തിക വർഷത്തെ ബജറ്റുമായി ബന്ധപ്പെട്ട്, ചില ഉത്പന്നങ്ങൾ ഒഴികെ മിക്കവാറും ഉത്പന്നങ്ങളുടെ ഇറക്കുമതി തീരുവ പത്ത് ശതമാനത്തിൽ താഴെയാക്കാൻ സർക്കാർ ലക്ഷ്യമിടുന്നു. ഇതിന്റെ ഭാഗമായി, ഇന്ത്യയുടെ ശരാശരി കസ്റ്റംസ് തീരുവ നിരക്ക് 11.65 ശതമാനത്തിൽ നിന്ന് 10.66 ശതമാനമായി കുറച്ചിട്ടുണ്ട്. തീരുവ സ്ലാബുകളുടെ എണ്ണം എട്ടായി പരിമിതപ്പെടുത്തിയിട്ടുണ്ട്, ഇതിൽ 'സീറോ ഡ്യൂട്ടി' നിരക്കും ഉൾപ്പെടുന്നു. 2024-ലെ ബജറ്റിൽ സർക്കാർ ഏഴ് തീരുവ നിരക്കുകൾ നീക്കം ചെയ്തതിനു പിന്നാലെ, 2026-ലെ ബജറ്റിലും ഏഴ് നിരക്കുകൾ കൂടി റദ്ദാക്കിയിട്ടുണ്ട്.