Hiroshima Day Observance: ഹിരോഷിമ ദിനത്തിൽ യുദ്ധവിരുദ്ധ പരിപാടികൾ സംഘടിപ്പിച്ചു

വാളക്കുളം: കെ.എച്ച്.എം.എച്ച്.എസ്. സ്‌കൂളിൽ ഹിരോഷിമ ദിനാചരണത്തിന്റെ ഭാഗമായി ‘യുദ്ധഭീകരനെ’ പ്രതീകാത്മകമായി വിചാരണ ചെയ്തു. ‘വാർ ഈസ് ക്രൈം’ എന്ന പരിപാടിയിൽ വിവിധ മത്സരങ്ങൾ, സംവാദം, ഹിരോഷിമയിൽ കൊല്ലപ്പെട്ടവർക്കുവേണ്ടി മൗനാചരണം എന്നിവയും സംഘടിപ്പിച്ചു. യുദ്ധ കുറ്റവിചാരണയ്ക്ക് ആൻ മരിയയും യുദ്ധവിരുദ്ധപ്രതിജ്ഞയ്ക്ക് ഫാത്തിമ മിൻഹയും നേതൃത്വം നൽകി. പ്രഥമാധ്യാപകൻ പി.എം. ഷംസുദ്ദീൻ, എൻ. ജയശ്രീ, കെ.പി. ഷാനിയാസ്, വി. ഇസ്ഹാഖ്, എം.പി. റജില, വി. ഫാസിൽ, കെ. ചിത്ര എന്നിവർ പങ്കെടുത്തു.

ഊരകം: വെങ്കുളം എം.യു. ഹയർസെക്കൻഡറി സ്‌കൂളിൽ മാതൃഭൂമി സീഡ് ക്ലബ്ബിന്റെ നേതൃത്വത്തിൽ സമാധാന മനുഷ്യരൂപം ഒരുക്കി ഹിരോഷിമ ദിനം ആചരിച്ചു. ഹിരോഷിമ പോസ്റ്റർ പ്രദർശനം, കൊളാഷ് നിർമാണം, സഡാക്കോ പേപ്പർ ക്രെയിൻ നിർമാണം, ബോധവത്കരണം എന്നിവയും സംഘടിപ്പിച്ചു. ചടങ്ങിൽ സ്‌കൂൾ ലീഡർ സാദിഖ് യുദ്ധവിരുദ്ധപ്രതിജ്ഞ ചൊല്ലി. ശിഹാബുദ്ദീൻ, അധ്യാപകരായ റിയാസ്, ഇ.പി. മുനീർ, മൊയ്തീൻകുട്ടി, ജാഫർ സാദിക്ക് തുടങ്ങിയവർ നേതൃത്വംനൽകി.

വള്ളിക്കുന്ന്: ഒലിപ്രം തിരുത്തി എ.യു.പി. സ്കൂളിൽ സാമൂഹികശാസ്ത്ര ക്ലബ്ബിന്റെ ആഭിമുഖ്യത്തിൽ ഹിരോഷിമ–നാഗസാക്കി ദിനാചരണത്തിന്റെ ഭാഗമായി വിവിധ ബോധവത്കരണ പരിപാടികൾ സംഘടിപ്പിച്ചു. ഇ. ബിജേഷ് ഉദ്ഘാടനംചെയ്തു. വിദ്യാർഥികൾ പങ്കെടുത്ത യുദ്ധവിരുദ്ധ റാലിയുണ്ടായി. ഹിരോഷിമ–നാഗസാക്കി ദുരന്തവും യുദ്ധത്തിന്റെ ഭീകരതയും പ്രമേയമാക്കിയ ഡോക്യുമെന്ററി പ്രദർശനം, യുദ്ധവിരുദ്ധ ക്വിസ്, ചിത്രരചന, ബാഡ്ജ് നിർമാണം തുടങ്ങിയ പരിപാടികളും നടന്നു. വള്ളിക്കുന്ന് ജി.എൽ.പി. സ്കൂളിൽ യുദ്ധവിരുദ്ധ സന്ദേശമുയർത്തി വിദ്യാർഥികൾ ഒരുമച്ചങ്ങല തീർത്തു. പ്രഥമാധ്യാപകൻ വി. നിഷാദ് യുദ്ധവിരുദ്ധ പ്രതിജ്ഞ ചൊല്ലിക്കൊടുത്തു. മനുഷ്യരാശിയെ നാശത്തിലേക്ക് നയിക്കുന്ന യുദ്ധം ലോകത്തിനാകെ ഭീഷണിയാണെന്നും സമാധാനവും സഹവർത്തിത്വവും ഉയർത്തിപ്പിടിക്കുമെന്നും വിദ്യാർഥികൾ പ്രതിജ്ഞയെടുത്തു.