Passport Fee Hike Reversal Demand:പ്രവാസികളുടെ പാസ്പോർട്ട് ഫീസ് വർധന പിൻവലിക്കണം - റിയാദ് കോട്ടക്കൽ മണ്ഡലം കെഎംസിസി

റിയാദ്: സൗദി അറേബ്യയിലും മറ്റ് വിദേശ രാജ്യങ്ങളിലും ജോലി ചെയ്യുന്ന ഇന്ത്യൻ പ്രവാസികളുടെ പാസ്പോർട്ട് സേവനങ്ങൾക്ക് കേന്ദ്ര സർക്കാർ ഏർപ്പെടുത്തിയ ഫീസ് വർധന പിൻവലിക്കണമെന്ന് റിയാദ് - കോട്ടക്കൽ മണ്ഡലം കെഎംസിസി എക്സിക്യൂട്ടീവ് യോഗം ആവശ്യപ്പെട്ടു. ഇന്ത്യയിൽ നിലവിലുള്ള നിരക്കുകളേക്കാൾ വളരെ ഉയർന്ന നിരക്കിൽ പാസ്പോർട്ട് പുതുക്കൽ ഉൾപ്പെടെയുള്ള സേവനങ്ങൾ വിദേശത്ത് നൽകുന്നത്, സാധാരണ പ്രവാസികൾക്ക് ഭാരം കൂടുന്നുവെന്നും യോഗം വ്യക്തമാക്കിയിട്ടുണ്ട്. പ്രവാസികൾ, വിദേശ നാണ്യം ഇന്ത്യയുടെ സമ്പദ്ഘടനയ്ക്ക് സംഭാവന ചെയ്യുന്നവരാണെന്നതിന്റെ അടിസ്ഥാനത്തിൽ, സർക്കാർ ഇവരോടു കരുണ കാണിക്കണമെന്ന് യോഗം ആവശ്യപ്പെട്ടു.

കോട്ടക്കൽ ആര്യവൈദ്യശാല, കാടാമ്പുഴ ക്ഷേത്രം, മൂന്നാക്കൽ ജുമാ മസ്ജിദ് എന്നിവയെ കുറ്റിപ്പുറം റെയിൽവേ സ്റ്റേഷനുമായി ബന്ധിപ്പിക്കുന്ന കെഎസ്ആർടിസിയുടെ പ്രിയദർശിനി ബസ് സർവീസ് ആരംഭിക്കണമെന്ന് യോഗം ആവശ്യപ്പെട്ടു. മണ്ഡലത്തിലെ വിവിധ വികസന പ്രശ്നങ്ങൾ ഉൾപ്പെടുത്തി പ്രൊഫ. ആബിദ് ഹുസൈൻ തങ്ങൾ എംഎൽഎക്ക് നിവേദനം നൽകാനും യോഗം തീരുമാനിച്ചു.

റിയാദ് കെഎംസിസി സെൻട്രൽ കമ്മിറ്റിയുടെ പ്രവാസി കുടുംബ സുരക്ഷ പദ്ധതി 2026-27 കാമ്പയിൻ വിജയിപ്പിക്കാൻ യോഗം തീരുമാനിച്ചു. മൊയ്തീൻ കോട്ടക്കൽ, ഫാറൂഖ് പൊന്മള എന്നിവരെ മണ്ഡലം തല കോർഡിനേറ്റർമാരായി യോഗം തെരഞ്ഞെടുത്തു. മലാസിൽ നടന്ന യോഗം മലപ്പുറം ജില്ല കെഎംസിസി വൈസ് പ്രസിഡന്റ് മൊയ്തീൻ കുട്ടി പൊന്മള ഉദ്ഘാടനം ചെയ്തു. മണ്ഡലം പ്രസിഡന്റ് ബഷീർ മുല്ലപ്പള്ളി യോഗം അധ്യക്ഷനായി. ഫൈസൽ എടയൂർ, മൊയ്തീൻ കുട്ടി പുവാട്, ഫർഹാൻ കാടാമ്പുഴ, ദിലൈപ് ചാപ്പനങ്ങാടി, മുഹമ്മദ് കല്ലിങ്ങൽ തുടങ്ങിയവർ ചർച്ചയിൽ പങ്കെടുത്തു. ആക്ടിംഗ് സെക്രട്ടറി ഗഫൂർ കോൽക്കളം സ്വാഗതവും ട്രഷറർ ഗഫൂർ കൊന്നക്കാട്ടിൽ നന്ദിയും പറഞ്ഞു.