Jharkhand Exam Scam:ജാർഖണ്ഡ് പരീക്ഷാ ക്രമക്കേട്: മൂന്ന് ജെപിഎസ്‌സി അംഗങ്ങൾ രാജിവെച്ചു, രാജി അംഗീകരിച്ച് ഗവർണർ

റാഞ്ചി: ജാർഖണ്ഡ് പബ്ലിക് സർവീസ് കമ്മീഷനിലെ (ജെ പി എസ് സി) പരീക്ഷാ ക്രമക്കേടുകളുമായി ബന്ധപ്പെട്ട അന്വേഷണം ശക്തമായതോടെ കമ്മീഷനിലെ മൂന്ന് അംഗങ്ങൾ രാജിവെച്ചതായി റിപ്പോർട്ട് ചെയ്യുന്നു. അജിത ഭട്ടാചാര്യ, അനിമ ഹൻസ്ദ, ജമാൽ അഹ്മദ് എന്നിവരാണ് രാജിക്കത്ത് സമർപ്പിച്ചത്. ക്രമക്കേടുകളെക്കുറിച്ചുള്ള അന്വേഷണത്തിന്റെ ഭാഗമായി സി ഐ ഡി നോട്ടീസ് നൽകിയതിന് പിന്നാലെയാണ് ഇവരുടെ രാജി. കമ്മീഷൻ അംഗങ്ങളുടെ രാജി ജാർഖണ്ഡ് ഗവർണർ അംഗീകരിച്ചിട്ടുണ്ട്. കഴിഞ്ഞ ജൂലൈ 22-ന് ജെ പി എസ് സി ചെയർമാൻ എൽ ഖിയാങ്‌ടെയും രാജിവെച്ചിരുന്നു. ഈ സാഹചര്യത്തിൽ, പരീക്ഷാ ക്രമക്കേടുകൾക്കെതിരായ വിദ്യാർത്ഥികളുടെ സമരം സംസ്ഥാനത്ത് കൂടുതൽ ശക്തമായിട്ടുണ്ട്. സമരക്കാർ നാളെ നിയമസഭയിലെ മാർച്ചിന് തയ്യാറെടുക്കുകയാണ്, കാരണം സർക്കാരുമായി നടത്തിയ മൂന്നാം വട്ട ചർച്ചയും പരാജയപ്പെട്ടു.

ജാർഖണ്ഡ് സംസ്ഥാനത്ത് വിദ്യാർത്ഥികൾ നടത്തുന്ന സമരത്തിന് പിന്നാലെ, സർക്കാരും വിദ്യാർത്ഥികളും നടത്തിയ മൂന്നാം വട്ട ചർച്ചയും പരാജയപ്പെട്ടതായി റിപ്പോർട്ട് ചെയ്യുന്നു. അഞ്ചു മണിക്കൂറോളം നീണ്ടു നിന്ന ഈ ചർച്ചയിൽ, വിദ്യാർത്ഥികളുടെ ചില ആവശ്യങ്ങൾ അംഗീകരിക്കാൻ സർക്കാർ തയ്യാറായില്ല. പരീക്ഷാ ക്രമക്കേടുകൾ സി ബി ഐ അന്വേഷിക്കണമെന്നാണ് വിദ്യാർത്ഥികളുടെ പ്രധാന ആവശ്യം. ഈ ആവശ്യം അംഗീകരിക്കാതെ സമരത്തിൽ നിന്ന് പിന്മാറില്ലെന്ന് വിദ്യാർത്ഥികൾ വ്യക്തമാക്കിയിട്ടുണ്ട്. സമരം തുടരുന്നതോടെ, ജാർഖണ്ഡ് മന്ത്രിയായ സുദിവ്യ കുമാർ, ക്രമക്കേടുകൾ കൈകാര്യം ചെയ്യാൻ ഒരു ഫാസ്റ്റ് ട്രാക്ക് കോടതി സ്ഥാപിക്കുമെന്നും 90 ദിവസത്തിനുള്ളിൽ കുറ്റപത്രം സമർപ്പിക്കുമെന്നും ചർച്ചകൾക്കു ശേഷം അറിയിച്ചു.