Shabarimala Neyy Kramakedu: ശബരിമല നെയ്യ് ക്രമക്കേട്: കൂടുതൽ വിവരങ്ങൾ പുറത്ത്; മിൽമയ്ക്ക് കരാർ നൽകിയതിലൂടെ ദേവസ്വം ബോർഡിന് നഷ്ടമായത് രണ്ടേകാൽ കോടിയിലധികം രൂപ

ശബരിമല നെയ്യ് ക്രമക്കേടുമായി ബന്ധപ്പെട്ട കൂടുതൽ വിവരങ്ങൾ പുറത്തുവന്നിട്ടുണ്ട്. മിൽമയ്ക്ക് നൽകിയ കരാർ മൂലമാണ് തിരുവിതാംകൂർ ദേവസ്വം ബോർഡിന് രണ്ട് കോടിയിലധികം രൂപയുടെ സാമ്പത്തിക നഷ്ടമുണ്ടായതെന്ന് വിജിലൻസ് കണ്ടെത്തിയിട്ടുണ്ട്. വിജിലൻസിൻ്റെ എഫ്ഐആർ ഏഷ്യാനെറ്റ് ന്യൂസിന് ലഭിച്ച വിവരം പ്രകാരം, മിൽമയ്ക്ക് അപേക്ഷിച്ച നിരക്കിൽ ക്വാട്ട് ചെയ്ത മൂന്നു കമ്പനികളെ ഒഴിവാക്കി. ഭക്തർ നൽകിയ നെയ്യ് ഉപയോഗിച്ച് അരവണ നിർമ്മാണം നടത്തിയതും, ഭക്ഷ്യഗുണനിലവാര പരിശോധന ഒഴിവാക്കിയതും എഫ്ഐആറിൽ വ്യക്തമാക്കുന്നു.

ടെൻഡർ നടപടിയിൽ പങ്കെടുത്തിട്ടില്ലാത്ത മിൽമയ്ക്ക് കരാർ ലഭ്യമാക്കണമെന്ന ഉദ്ദേശ്യത്തോടെ, മൂന്നാം പ്രതി മുരാരിബാബു ശാസ്ത്രീയമായ യാതൊരു അടിസ്ഥാനവുമില്ലാതെ ഒരു ബാച്ച് അരവണ തയ്യാറാക്കുന്നതിനായി 10 ലിറ്റർ നെയ്യിന് പകരം 7 ലിറ്റർ മിൽമ നെയ്യ് മാത്രം മതിയാകുമെന്ന റിപ്പോർട്ട് തിരുവിതാംകൂർ ദേവസ്വം ബോർഡിന് സമർപ്പിച്ചതായും ആരോപണമുണ്ട്. അഴിമതി നിരോധന നിയമം, 1988-ലെ വകുപ്പ് 7, 13(2) സഹിതം 13(1)(എ) എന്നിവയ്ക്ക് പുറമെ, ഭാരതീയ ന്യായ സംഹിത, 2023-ലെ 61(2), 316(5) എന്നീ വകുപ്പുകൾ ചുമത്തിയാണ് കേസെടുത്തിരിക്കുന്നത്.

തമിഴ്നാട്ടിലെ കുങ്കുമരാജ് ഡയറിക്ക് ലിറ്ററിന് 369 രൂപ, കൊച്ചിയിലെ സ്വാമി അയ്യപ്പ എന്റർപ്രൈസസിന് 375 രൂപ എന്നിങ്ങനെ നെയ്യിനായി ടെണ്ടർ നൽകിയതായി കണ്ടെത്തിയിട്ടുണ്ട്. പ്രതികൾ ലിറ്ററിന് 510 രൂപ നിരക്കിൽ മിൽമ നെയ്യ് വാങ്ങുന്നതിന് അനുമതി നൽകിയതായും ആരോപണമുണ്ട്. അതിന്റെ അടിസ്ഥാനത്തിൽ 1,61,535 ലിറ്റർ നെയ്യ് വാങ്ങിയതായി എഫ്ഐആറിൽ പറയുന്നു. മിൽമയ്ക്ക് നൽകിയ കരാറിന്റെ മറവിൽ ഗുണനിലവാരമില്ലാത്ത നെയ്യ് ശബരിമലയിൽ എത്തിച്ച് ക്രമക്കേട് നടത്തിയതായി കണ്ടെത്തലുകൾ വ്യക്തമാക്കുന്നു. ഹൈക്കോടതി നിർദ്ദേശപ്രകാരമാണ് എഫ്.ഐ.ആർ രജിസ്റ്റർ ചെയ്തത്. ദേവസ്വം ബോർഡ് മുൻ പ്രസിഡന്റ് പി.എസ് പ്രശാന്ത്, അംഗമായിരുന്ന അജികുമാർ, മുൻ ശബരിമല എക്സിക്യൂട്ടീവ് ഓഫീസർ മുരാരി ബാബു എന്നിവരെ പ്രതി ചേർത്താണ് എഫ്.ഐ.ആർ രജിസ്റ്റർ ചെയ്തത്. വിജിലൻസിന്റെ സതേൺ റേഞ്ചിലാണ് എഫ്.ഐ.ആർ രജിസ്റ്റർ ചെയ്തത്.