KCL Season 3 Begins: കേരള ക്രിക്കറ്റ് ലീഗ് മൂന്നാം സീസൺ 20-ന് ആരംഭിക്കുന്നു

തിരുവനന്തപുരം: കേരള ക്രിക്കറ്റ് ലീഗ് (കെ.സി.എൽ.)യുടെ മൂന്നാം സീസൺ 20-ന് തിരുവനന്തപുരം കാര്യവട്ടം ഗ്രീൻഫീൽഡ് സ്‌റ്റേഡിയത്തിൽ ആരംഭിക്കും. സെപ്റ്റംബർ 5-ന് ഫൈനൽ മത്സരവും നടക്കും. 17 ദിവസങ്ങളോളം നീളുന്ന ഈ ചാമ്പ്യൻഷിപ്പിൽ ട്രിവാൻഡ്രം റോയൽസ്, ഏരീസ് കൊല്ലം സെയിലേഴ്‌സ്, ആലപ്പി റിപ്പിൾസ്, കൊച്ചിൻ ബ്ലൂ ടൈഗേഴ്‌സ്, തൃശ്ശൂർ ടൈറ്റൻസ്, കാലിക്കറ്റ് ഗ്ലോബ്സ്റ്റാർസ് എന്നീ ടീമുകൾ പങ്കെടുക്കും. എല്ലാ ടീമുകളും അവരുടെ ക്യാപ്റ്റന്മാരെയും പരിശീലകരെയും പ്രഖ്യാപിച്ച് പരിശീലനം ആരംഭിച്ചിരിക്കുകയാണ്. ആകെ 107 താരങ്ങൾ മത്സരത്തിനായി തയ്യാറെടുക്കുകയാണ്. ആദ്യ മത്സരം കാലിക്കറ്റ് ഗ്ലോബ് സ്റ്റാർസും തൃശ്ശൂർ ടൈറ്റൻസും തമ്മിലാണ് നടക്കുന്നത്.

ട്രിവാൻഡ്രം റോയൽസിനെ ക്യാപ്റ്റൻ കൃഷ്ണപ്രസാദ് നയിക്കും. അദ്ദേഹത്തിന്റെ കൂടെ സിജോമോൻ ജോസഫാണ് വൈസ് ക്യാപ്റ്റൻ. കഴിഞ്ഞ സീസണിൽ 479 റൺസ് നേടിയ കൃഷ്ണപ്രസാദ്, റൺവേട്ടയിൽ മികച്ച പ്രകടനം കാഴ്ചവച്ചിരുന്നു. പരിശീലകനായി എസ്.എൽ. അഭിഷേക് മോഹനാണ്. ഏരീസ് കൊല്ലം സെയിലേഴ്‌സ് പുതിയ സീസണിൽ യുവതാരം വത്സൽ ഗോവിന്ദിനെ ക്യാപ്റ്റനായി നിയമിച്ചിട്ടുണ്ട്. താരലേലത്തിൽ സെയിലേഴ്‌സ് തിരികെയെത്തിച്ച താരം കൂടിയാണ് വത്സൽ. കെ.സി.എലിൽ 28 മത്സരങ്ങളിൽ 850 റൺസ് നേടിയ വത്സലിന് എട്ടു വിക്കറ്റും ലഭിച്ചിട്ടുണ്ട്. അഭിഷേക് ജെ. നായർ ആണ് ടീമിന്റെ വൈസ് ക്യാപ്റ്റൻ, കെ.കെ. ജിയാസാണ് പരിശീലകൻ.