Free UAE Visa for Indians: ഇന്ത്യക്കാർക്ക് സൗജന്യ യുഎഇ വിസ, പുതിയ ആകർഷകമായ അവധിക്കാല ഓഫറുമായി അബുദാബി

അബുദാബി: ഇന്ത്യൻ വിനോദസഞ്ചാരികളെ ആകർഷിക്കാൻ അബുദാബി സാംസ്കാരിക വിനോദസഞ്ചാര വകുപ്പ് പുതിയ ഒരു ആകർഷകമായ ഓഫർ പ്രഖ്യാപിച്ചു. നിശ്ചിത ട്രാവൽ പങ്കാളികൾ വഴി അബുദാബിയിലേക്ക് ഹോളിഡേ പാക്കേജ് ബുക്ക് ചെയ്യുന്ന യോഗ്യരായ ഇന്ത്യൻ പാസ്‌പോർട്ട് ഉടമകൾക്ക് യുഎഇ എൻട്രി വിസ സൗജന്യമായി നൽകുന്ന പദ്ധതിക്ക് തുടക്കമായി. ഈ ഓഫർ ഓഗസ്റ്റ് 1 മുതൽ ഒക്ടോബർ 31 വരെ ലഭ്യമാണ്. ആദ്യ ഘട്ടത്തിൽ, 20,000 വിസകൾക്കാണ് ഈ ആനുകൂല്യം ലഭ്യമാകുന്നത്, ഇത് ഒരു പൈലറ്റ് പദ്ധതിയുടെ ഭാഗമായി നടപ്പിലാക്കപ്പെടുന്നു.

ഇന്ത്യയിൽ നിന്ന് യാത്ര ചെയ്യാൻ പോകുന്ന ഇന്ത്യൻ പാസ്‌പോർട്ട് ഉടമകൾക്ക് മാത്രമാണ് ഈ ആനുകൂല്യം ലഭ്യമാകുന്നത്. ഈ ഓഫറിന് യോഗ്യത നേടുന്നതിന് ചില നിബന്ധനകൾ പാലിക്കേണ്ടതുണ്ട്. അബുദാബിയിലെ ഒരു ഹോട്ടലിൽ കുറഞ്ഞത് മൂന്നു രാത്രികൾ താമസം ബുക്ക് ചെയ്തിരിക്കണം, കൂടാതെ ഇന്ത്യയിൽ നിന്നുള്ള റിട്ടേൺ വിമാന ടിക്കറ്റ് ഉണ്ടായിരിക്കണം. ഈ പദ്ധതിയിൽ പങ്കാളികളായ അംഗീകൃത ട്രാവൽ ഏജൻസികൾ വഴിയോ ഓൺലൈൻ ട്രാവൽ ഏജൻസികൾ വഴിയോ ആയിരിക്കണം പാക്കേജ് ബുക്ക് ചെയ്യേണ്ടത്. വ്യക്തിഗതമായി അപേക്ഷിക്കുന്നവർക്ക് ഈ ഓഫർ ലഭ്യമാകില്ല, മാത്രമല്ല, അംഗീകൃത ട്രാവൽ പങ്കാളികൾ വഴി ബുക്ക് ചെയ്യുന്ന പാക്കേജുകൾക്കാണ് ഇത് ബാധകം.

ഇന്ത്യൻ സഞ്ചാരികൾക്ക് വരുന്ന എൻട്രി വിസയുടെ മുഴുവൻ ചെലവുകളും അബുദാബി സാംസ്കാരിക വിനോദസഞ്ചാര വകുപ്പാണ് വഹിക്കുന്നത്. ട്രാവൽ ഏജൻസികൾക്ക് ഈ പദ്ധതിയുടെ ഭാഗമാകാൻ രണ്ട് വ്യത്യസ്ത മാർഗങ്ങൾ ഉണ്ട്. ഒരു മാർഗം, ഡെസ്റ്റിനേഷൻ മാനേജ്‌മെന്റ് കമ്പനി (ഡിസിടി) വഴി നേരിട്ട് വിസ ചെലവുകൾ വഹിക്കുന്നത് ആണ്. മറ്റൊരു മാർഗം, മറ്റ് ഡിഎംസി പങ്കാളികൾ വഴിയാണ് ചെയ്യുന്നതെങ്കിൽ, അനുവദിക്കുന്ന ഓരോ വിസയ്ക്കും 285 ദിർഹം വീതം ഡിസിടി തിരികെ നൽകും. ഇന്ത്യ അബുദാബിയുടെ ഏറ്റവും പ്രധാനപ്പെട്ട അന്താരാഷ്ട്ര വിനോദസഞ്ചാര വിപണിയാണെന്നും, ഇന്ത്യൻ സഞ്ചാരികൾക്ക് അബുദാബിയിലേക്കുള്ള യാത്ര കൂടുതൽ എളുപ്പമാക്കാനും ചെലവ് കുറയ്ക്കാനും ഈ നീക്കം സഹായിക്കുമെന്നും ഡിസിടി അബുദാബി ഇന്റർനാഷണൽ ഓപ്പറേഷൻസ് ഡയറക്ടർ അബ്ദുള്ള യൂസഫ് പറഞ്ഞു.