Houseboat Journey in Vembanad Lake: വേമ്പനാട്ട് കായലില് ഹൗസ്ബോട്ട് യാത്ര; കായല് സൗന്ദര്യം ആസ്വദിച്ച് യുഎസ് സ്ഥാനപതിയും ട്രംപിന്റെ മരുമകനും
തിരുവനന്തപുരം: പുന്നമടയിലെ വേമ്പനാട്ട് കായലില് ഹൗസ്ബോട്ട് യാത്ര ആസ്വദിച്ച ഇന്ത്യയിലെ യുഎസ് അംബാസഡര് സെര്ജിയോ ഗോറും, പ്രസിഡന്റ് ഡോണള്ഡ് ട്രംപിന്റെ മരുമകനും
തിരുവനന്തപുരം: പുന്നമടയിലെ വേമ്പനാട്ട് കായലില് ഹൗസ്ബോട്ട് യാത്ര ആസ്വദിച്ച ഇന്ത്യയിലെ യുഎസ് അംബാസഡര് സെര്ജിയോ ഗോറും, പ്രസിഡന്റ് ഡോണള്ഡ് ട്രംപിന്റെ മരുമകനും, യുഎസ് ബിസിനസ് എക്സിക്യുട്ടീവായ മൈക്കല് ബൗലോസും പങ്കെടുത്തു. കേരളത്തിലെ പ്രീമിയം ഹൗസ്ബോട്ട് ടൂറിസം മേഖലയിലെ പ്രമുഖ ബ്രാന്ഡായ സ്പൈസ് റൂട്ട്സ് ലക്ഷ്വറി ക്രൂയിസ് ഒരുക്കിയ ഹൗസ്ബോട്ട് യാത്രയില് ഇവര് പങ്കെടുത്തു. വേമ്പനാട് കായലിലൂടെ ഈ ആഡംബര ഹൗസ്ബോട്ടില് ചില മണിക്കൂറുകള് സഞ്ചരിച്ചാണ് ഇവര് കായലിന്റെ മനോഹാരിത ആസ്വദിച്ചത്. കേരളത്തിലെ പ്രശസ്തമായ നെഹ്റു ട്രോഫി വള്ളംകളിക്ക് ദിവസങ്ങള് മാത്രം ബാക്കി നില്ക്കുമ്പോഴാണ് ഇവരുടെ സന്ദര്ശനം നടന്നത്. വള്ളം കളിക്കായി പരിശീലനം നടത്തുന്ന തുഴച്ചില്ക്കാരെ കാണാനും ഇവര്ക്ക് സാധിച്ചു. കേരളത്തിലെ പ്രകൃതിയുടെ സൗന്ദര്യം ആസ്വദിച്ചുകൊണ്ടുള്ള ഈ യാത്ര അതീവ ഹൃദ്യമായിരുന്നുവെന്ന് സ്പൈസ് റൂട്ട്സ് ലക്ഷ്വറി ക്രൂയിസ് മാനേജിങ് പാര്ട്ണര് ജോബിന് ജെ അക്കരക്കളം പറഞ്ഞു.
മുഖ്യമന്ത്രി വി ഡി സതീശനുമായി കൊച്ചിയില് കൂടിക്കാഴ്ച നടത്തിയ ശേഷം ഇരുവരും ആലപ്പുഴയിലെത്തിയിരുന്നു. ഈ സന്ദര്ശനം കേരള ടൂറിസത്തിന് ലഭിച്ച വലിയ അംഗീകാരമാണെന്ന് ജോബിന് അഭിപ്രായപ്പെട്ടു. ഹൗസ്ബോട്ടില് യാത്ര ചെയ്യുന്നതിനിടെ കായലിനിരുവശത്തുള്ള തെങ്ങിന് നിരകളുടെ ദൃശ്യങ്ങളും വീഡിയോകളും ഇരുവരും പകര്ത്തി. ഇവ തങ്ങളുടെ സുഹൃത്തുക്കളുമായി പങ്കുവയ്ക്കുമെന്നും, കുടുംബത്തോടൊപ്പം കേരളത്തിലെത്തി ഒരു രാത്രി തങ്ങാന് ആഗ്രഹിക്കുന്നതായും അവര് പറഞ്ഞു. ഹൗസ്ബോട്ടില് ഒരുക്കിയിരുന്ന ചിക്കന് സാന്ഡ് വിച്ച്, ബ്രൗണി ചോക്ലേറ്റ് തുടങ്ങിയ വിഭവങ്ങള് അതിഥികള്ക്കായി ഒരുക്കിയിരുന്നു. കരിമീന് ഉള്പ്പെടെയുള്ള കേരളീയ വിഭവങ്ങളടങ്ങിയ ഉച്ചഭക്ഷണം നല്കാന് ആഗ്രഹിച്ചിരുന്നെങ്കിലും തിരക്കേറിയ പരിപാടികള് കാരണം അത് സാധിച്ചില്ലെന്നും ജോബിന് പറഞ്ഞു.
