Onam Celebration in Houston:ഹൂസ്റ്റൺ ശ്രീ ഗുരുവായൂരപ്പൻ ക്ഷേത്രത്തിൽ ഓണാഘോഷം 2026 ആഗസ്റ്റ് 23-ന്

ഹൂസ്റ്റൺ: സമൃദ്ധിയുടെ പ്രതീകമെന്നോണം വസന്തത്തിന്റെ വരവറിയിച്ചുകൊണ്ട് പുതുപുത്തൻ ഹൂസ്റ്റോണം വരവായി. 2026 ആഗസ്റ്റ് 23-ന് രാവിലെ 10 മണിമുതൽ ഹൂസ്റ്റൺ റോസൻബെർഗ് എപിക് സെന്ററിൽ ശ്രീ ഗുരുവായൂരപ്പൻ ക്ഷേത്രത്തിന്റെ ഹൂസ്റ്റോണം പൊന്നോണം നടക്കുമെന്ന് പ്രസിഡന്റ് ഡോ. രാംദാസ് അറിയിച്ചു. ഓണസദ്യയുടെ മുഖ്യ ആകർഷണമായി പ്രശസ്ത നളപാചക വിദഗ്ധൻ തൃശൂർ അംബി സ്വാമി സദ്യ ഒരുക്കും. പരമ്പരാഗത പാചകശൈലിയുടെ ആത്മാവും രുചിയും സംരക്ഷിച്ചുകൊണ്ടുള്ള വിഭവങ്ങളാണ് സദ്യയിൽ ഉൾക്കൊള്ളിച്ചിരിക്കുന്നത്. നാലായിരത്തോളം അഭ്യുദയകാംക്ഷികൾ പ്രവേശന പാസ് നേടിക്കഴിഞ്ഞു, സമ്പൂർണ്ണ രുചിയും പാരമ്പര്യവും ഉൾക്കൊള്ളുന്ന രുചിഭേദങ്ങളുടെ മായാപ്രപഞ്ചം തന്നെയാണ് ഒരുക്കുന്നത്. നാക്കിലയിൽ അല്ലങ്കിൽ തൂശനിലയിലാണ് സദ്യ വിളമ്പുന്നത്. മലയാളത്തിന്റെ എല്ലാ തനതു കലാരൂപങ്ങളും പക്വതയോടെ അവതരിപ്പിക്കുന്ന കലാപരിപാടികൾ ഹൂസ്റ്റോണിന് കൂടുതൽ ഭംഗി പകരും. ടെക്‌സസ്സിലെ പ്രശസ്ത ഡാൻസ് സ്‌കൂളുകൾ നടനവിസ്മയം തീർക്കാൻ അഹോരാത്രം പരിശീലിച്ചുകൊണ്ടിരിക്കുന്നു. തെയ്യം, തിരുവാതിര, പുലിക്കളി, ചെണ്ടമേളം, കുച്ചിപ്പുടി, ഒപ്പന എന്നിവ ഉൾപ്പെടുന്ന വൈവിധ്യമാർന്ന കലാപരിപാടികൾ മലയാളികളുടെ ഓർമ്മകളിൽ പതിയുന്ന അനുഭവമാകും. ഹൂസ്റ്റണിലെ കൗണ്ടി ഓഫീസർമാർ കൗൺസിലെറ്റ് ഓഫിസേഴ്സ് മറ്റ് കലാ സാംസ്‌കാരിക രംഗത്തെ പ്രമുഖരും പങ്കെടുക്കുന്ന പൊതുസമ്മേളനവും ആകർഷണമാണെന്ന് മുഖ്യ പ്രോഗ്രാം കോഓർഡിനേറ്റർ സുനിൽ നായർ അറിയിച്ചു. അമേരിക്കയിലെ മലയാളി സമൂഹത്തിന്റെ ഐക്യവും പാരമ്പര്യവും ഒരുമയോടെ ഒത്തുചേർന്ന് ആഘോഷിക്കുന്ന ഒരു പ്രധാന സാംസ്‌കാരിക വേദിയായി ഈ പൊന്നോണം ഹൂസ്റ്റോണം മാറുമെന്ന് പ്രസിഡന്റ് ഡോ. രാംദാസ് പറഞ്ഞു.