New Features in Google Maps:ഗൂഗിൾ മാപ്‌സിൽ ഭക്ഷണം ഓർഡർചെയ്യാം ഹോട്ടൽ ബുക്ക് ചെയ്യാം; ഞെട്ടിക്കാൻ പുതിയ ഫീച്ചറുകൾ

യാത്രയ്ക്കിടെ ഭക്ഷണം ഓർഡർ ചെയ്യാനും ഹോട്ടൽ ബുക്ക് ചെയ്യാനും സഹായിക്കുന്ന പുതിയ ഫീച്ചർ ഗൂഗിൾ മാപ്‌സിൽ അവതരിപ്പിച്ചു. യാത്ര ചെയ്യുന്ന സമയത്ത് ഓരോ റെസ്റ്റോറന്റും തിരഞ്ഞ് മികച്ചത് കണ്ടെത്തുന്നതിന് പകരം, ഗൂഗിൾ മാപ്‌സിനെ ഉപയോഗിച്ച് ഈ ജോലി എളുപ്പത്തിൽ ചെയ്യാം. നിങ്ങൾക്ക് ആവശ്യമായ ഭക്ഷണം ലഭിക്കുന്ന റൂട്ടിലെ റെസ്റ്റോറന്റുകൾ കണ്ടെത്തുകയും, അവ തുറന്നിട്ടുണ്ടോയെന്ന് പരിശോധിക്കുകയും, നിങ്ങളുടെ ഭക്ഷണരീതികൾക്കനുസരിച്ച് ശുപാർശകൾ നൽകുകയും ചെയ്യുന്നു. ഈ പുതിയ ഫീച്ചർ ഉപയോക്താക്കൾക്ക് യാത്ര ചെയ്യുമ്പോൾ കൂടുതൽ സൗകര്യം നൽകും.

താമസത്തിനുള്ള ഹോട്ടലുകൾ തിരഞ്ഞെടുക്കുന്നതിലും ഈ ആപ്പ് സഹായകരമാണ്. ഒരേ സമയം നിരവധി ഹോട്ടലുകൾ പരിശോധിച്ച്, മികച്ചത് കണ്ടെത്താൻ സമയം കളയേണ്ടതില്ല. വിശാലമായ മുറികളുള്ള ഫാമിലി ഫ്രണ്ട്‌ലി ബജറ്റ് ഹോട്ടൽ കണ്ടെത്താൻ ഗൂഗിൾ മാപ്‌സിനോട് പറയുകയാണെങ്കിൽ, നിരക്കുകളും റൂം ലഭ്യതയും പരിശോധിച്ച് അനുയോജ്യമായ ഓപ്ഷനുകൾ നൽകും. ഈ ഫീച്ചറുകൾ ഉപയോക്താക്കൾക്ക് യാത്ര ചെയ്യുമ്പോൾ കൂടുതൽ സൗകര്യം നൽകുന്നതിനായി രൂപകൽപ്പന ചെയ്തതാണ്.

യാത്ര ആസ്വാദികരമാക്കാൻ ഗൂഗിൾ മാപ്‌സിൽ മറ്റ് ഫീച്ചറുകളും ഉൾപ്പെടുത്തിയിട്ടുണ്ട്. യാത്ര ചെയ്യുന്ന വഴിയിലുള്ള ഉത്സവങ്ങൾ, സംഗീത പരിപാടികൾ, പ്രാദേശിക മേളകൾ എന്നിവയെക്കുറിച്ചുള്ള വിവരങ്ങൾ, ടിക്കറ്റുകൾ ബുക്ക് ചെയ്യുന്നതിനുള്ള ലിങ്കുകൾ സഹിതം, മാപ്സ് ശുപാർശ ചെയ്യും. ആദ്യഘട്ടത്തിൽ ഈ ഫീച്ചറുകൾ യു.എസിൽ മാത്രമാണ് ലഭ്യമാക്കിയിട്ടുള്ളത്, എന്നാൽ ഉടൻ ഇന്ത്യയിലും ലഭ്യമാകുമെന്നാണ് പ്രതീക്ഷ. ഇന്ത്യയിലെ ഉപയോക്താക്കൾക്കായി, ഹിന്ദിയിൽ സെർച്ച് ചെയ്യാനുള്ള ഫീച്ചർ കൂടി അവതരിപ്പിച്ചിട്ടുണ്ട്. റെസ്റ്റോറന്റുകൾ, വിനോദസഞ്ചാര കേന്ദ്രങ്ങൾ എന്നിവയെക്കുറിച്ച് ഹിന്ദിയിൽ ചോദ്യങ്ങൾ ചോദിക്കാം.

ഗൂഗിൾ മാപ്‌സിൽ പുതിയ ഓപ്ഷനായി, ജിമെയിൽ പോലുള്ള ഗൂഗിൾ സേവനങ്ങളിൽ നിന്നുള്ള വിവരങ്ങൾ ഉപയോഗിക്കാൻ കഴിയുന്ന പേഴ്‌സണൽ ഇന്റലിജൻസും ഉൾപ്പെടുത്തിയിട്ടുണ്ട്. ഹോട്ടൽ ബുക്കിങ്, ഫ്‌ളൈറ്റ് കൺഫർമേഷൻ എന്നിവയെക്കുറിച്ചുള്ള വിവരങ്ങൾ ലഭ്യമാക്കുന്നതാണ് ഈ ഫീച്ചർ. ബസ്, മെട്രോ, ട്രെയിൻ, ഫെറി എന്നിവയ്ക്കുള്ള തത്സമയ അപ്ഡേറ്റുകൾ നൽകുന്ന റിയൽ-ടൈം ട്രാൻസിറ്റ് ഇൻഫർമേഷനും പുതുതായി ഉൾപ്പെടുത്തിയിട്ടുണ്ട്. ഗൂഗിൾ മാപ്സ് ഒരു നാവിഗേഷൻ ആപ്ലിക്കേഷനായാണ് ആരംഭിച്ചെങ്കിലും, യാത്രയ്ക്കിടെ എല്ലാ സേവനങ്ങളും നൽകുന്ന എഐ സംവിധാനമായി അത് വളരുകയാണെന്ന് ഗൂഗിൾ വ്യക്തമാക്കുന്നു.