UAE Summer Tourism Active:യു.എ.ഇ.യിൽ വേനൽടൂറിസം സജീവം

അബുദാബി: വൈവിധ്യമാർന്ന സാംസ്കാരിക, പൈതൃക, വിനോദ പരിപാടികളുമായി യു.എ.ഇ.-യുടെ സമ്മർ ടൂറിസം സീസൺ ഇപ്പോൾ സജീവമായിരിക്കുകയാണ്. മികച്ച അടിസ്ഥാനസൗകര്യങ്ങളും ആഗോള നിലവാരത്തിലുള്ള സേവനങ്ങളും മുൻനിർത്തി, ഈ വേനലിൽ നിരവധി വിദേശികളും നാട്ടുകാരും യു.എ.ഇ.യിലേക്ക് എത്തിച്ചേരുന്നുണ്ട്. കഴിഞ്ഞ വർഷം ടൂറിസം മേഖലയിലെ റെക്കോഡ് നേട്ടങ്ങളുടെ തുടർച്ചയാണ് ഈ വർഷത്തെ സമ്മർ സീസൺ. 2025-ൽ യു.എ.ഇ.-യിലെ ഹോട്ടലുകളിൽ എത്തിച്ചിരിക്കുന്ന അതിഥികളുടെ എണ്ണം 3.23 കോടിയായി ഉയർന്നിരുന്നു, ആകെ വരുമാനം 4921 കോടി ദിർഹമാണ്. അബുദാബിയിൽ ഈ വേനൽക്കാലത്ത് പൈതൃക ഉത്സവങ്ങൾക്കാണ് മുൻഗണന നൽകിയത്. 80,000-ത്തോളം സന്ദർശകരെ ആകർഷിച്ച 22-ാമത് ലിവ ഈന്തപ്പഴ ഉത്സവം, 74,599 പേർ എത്തിയ പ്രഥമ അൽ ഐൻ ഈന്തപ്പഴ ഉത്സവം എന്നിവയാണ് പ്രധാനപ്പെട്ടവ. ഇതിന് പുറമെ, ലൂവ്ര് അബുദാബി, നാച്വറൽ ഹിസ്റ്ററി മ്യൂസിയം, സായിദ് നാഷണൽ മ്യൂസിയം തുടങ്ങിയവയും യാസ് ഐലൻഡിലെ വിനോദ കേന്ദ്രങ്ങളും സഞ്ചാരികളെ ആകർഷിക്കുന്നുണ്ട്. ദുബായ് സമ്മർ സർപ്രൈസസ് (ഡി.എസ്.എസ്) വിവിധ ഷോപ്പിങ് ഓഫറുകൾക്കും വിനോദ പരിപാടികൾക്കും പുറമെ, മാൾ ഓഫ് എമിറേറ്റ്‌സിലെ സർക്കസ്, നൃത്തം തുടങ്ങിയ കലാപരിപാടികളിലൂടെയും ശ്രദ്ധേയമാകുന്നു. ഇബ്ൻ ബത്തൂത്ത മാളിൽ ഇൻഡോർ റണ്ണിങ് മത്സരങ്ങൾ സംഘടിപ്പിക്കുന്നുണ്ട്. ഷാർജ സമ്മർ പ്രൊമോഷൻസും 35,000-ത്തിലധികം ആളുകൾ സന്ദർശിച്ച 10-ാമത് അൽ ദെയ്ദ് ഈന്തപ്പഴ ഉത്സവവും കാർഷികമേഖലയ്ക്കും ടൂറിസത്തിനും വലിയ ഉത്തേജനം നൽകുന്നു. അജ്മാനിൽ ലിവ അജ്മാൻ ഡേറ്റ്‌സ് ആൻഡ് ഹണി ഫെസ്റ്റിവലും നടന്നു. ഈ ടൂറിസം പദ്ധതികൾ പ്രാദേശിക സമ്പദ്‌വ്യവസ്ഥയെയും ഹോസ്പിറ്റാലിറ്റി, റീട്ടെയിൽ, ഗതാഗത മേഖലകളെയും സജീവമാക്കുന്നതോടൊപ്പം, യു.എ.ഇ.-യുടെ തനത് പൈതൃകത്തെ അടുത്തറിയാൻ സന്ദർശകർക്ക് അവസരമൊരുക്കുകയും ചെയ്യുന്നു.