Gulf's First Craft Museum in Sharjah: ഷാർജയിൽ വരുന്നു ഗൾഫിലെ ആദ്യത്തെ കരകൗശല മ്യൂസിയം

ഷാർജയിൽ ഗൾഫിന്റെ ചരിത്രത്തിൽ പുതിയൊരു അധ്യായം കുറിക്കുന്ന സമകാലിക കരകൗശല മ്യൂസിയമായ 'ഇർത്തി മ്യൂസിയം' ഉടൻ ആരംഭിക്കും. യു.എ.ഇ.യിലെ കരകൗശല പാരമ്പര്യങ്ങളെ സംരക്ഷിക്കുകയും, അവയെ സമകാലിക കാഴ്ചപ്പാടുകളിലൂടെ പുനർവ്യാഖ്യാനിച്ച് ഭാവി തലമുറയിലേക്ക് കൈമാറുന്നതിനുള്ള ശ്രമമാണ് ഈ മ്യൂസിയത്തിന്റെ ലക്ഷ്യം. ഇർത്തി കണ്ടമ്പററി ക്രാഫ്റ്റ്‌സ് കൗൺസിൽ ഈ ചരിത്രപരമായ പദ്ധതിക്ക് രൂപം നൽകിയത്, രാജ്യത്തെ കരകൗശല പാരമ്പര്യങ്ങൾ പുനരുജ്ജീവിപ്പിക്കുന്നതിലും സ്ത്രീ കരകൗശല വിദഗ്ധരെ ശാക്തീകരിക്കുന്നതിലും കഴിഞ്ഞ പത്തുവർഷമായി നടത്തുന്ന പ്രവർത്തനങ്ങളുടെ സമാപ്തിയാണ്. ഷാർജയുടെ സാംസ്കാരിക-സർഗാത്മക രംഗത്ത് ഈ തീരുമാനം കൂടുതൽ ഊട്ടിയുറപ്പിക്കുമെന്ന് പ്രതീക്ഷിക്കുന്നു. മ്യൂസിയം, സമകാലിക കരകൗശല വസ്തുക്കളുടെ പരിണാമം രേഖപ്പെടുത്തുകയും പ്രദർശിപ്പിക്കുകയും ചെയ്യുന്ന ഒരു സ്ഥിരം സാംസ്കാരിക സ്ഥാപനമായിരിക്കും. ഈ മ്യൂസിയം കരകൗശല രംഗത്ത് ഗവേഷണം, വിദ്യാഭ്യാസം, ഡിസൈൻ നവീകരണം എന്നിവയ്ക്ക് ഊന്നൽ നൽകുകയും, പുതിയ തലമുറയിലേക്ക് അറിവുകൾ കൈമാറുന്നതിലൂടെ കരകൗശല വിദഗ്ധർക്ക് പുതിയ തൊഴിലവസരങ്ങൾ സൃഷ്ടിക്കാനും സഹായിക്കും. ഷാർജ ക്രിയേറ്റീവ് ക്വാർട്ടറിലാണ് മ്യൂസിയം സ്ഥാപിക്കുന്നത്, ഇവിടെ വിവിധ സാംസ്കാരിക-സർഗാത്മക സ്ഥാപനങ്ങൾ പ്രവർത്തിക്കുന്നു. കരകൗശല-നാടോടി കലാ വിഭാഗത്തിൽ യുനെസ്കോയുടെ അംഗീകാരം നേടിയ ഷാർജയുടെ പൈതൃക സംരക്ഷണ പ്രവർത്തനങ്ങൾക്ക് ഇത് പുതിയ തിളക്കം നൽകും. ‘‘നമ്മുടെ സമ്പന്നമായ കരകൗശല രീതികളെ ഭാവിലേക്ക് പകർന്നു നൽകാനുള്ള പ്രതിജ്ഞാബദ്ധതയാണ് ഈ മ്യൂസിയം. അത് ചരിത്രശേഷിപ്പായി ഒതുങ്ങാതെ, എക്കാലത്തും സജീവമായി വളരുന്ന ഒരു പാരമ്പര്യമായി ഇവിടെ ആഘോഷിക്കപ്പെടും’’- ഇർത്തി കണ്ടമ്പററി ക്രാഫ്റ്റ്‌സ് കൗൺസിൽ ഡയറക്ടർ ജനറൽ റീം ബിൻ കറം പറഞ്ഞു. പാരമ്പര്യത്തെയും ആധുനികതയെയും ഇണക്കിചേർക്കുന്ന ഇർത്തി മ്യൂസിയം, ആഗോളതലത്തിൽ ഷാർജയെ കരകൗശല കലകളുടെ പ്രധാന കേന്ദ്രമാക്കി മാറ്റുമെന്നാണ് പ്രതീക്ഷിക്കുന്നത്.