Salary Journey:ശമ്പളം 22,000 -ത്തിൽ നിന്നും 1.16 ലക്ഷത്തിലേക്ക്, സർക്കാർ ജോലിക്ക് കയറിയ കഥ പറഞ്ഞ് യുവാവ്

സോഷ്യല്‍ മീഡിയയിൽ ശ്രദ്ധ നേടിയ ഒരു സർക്കാർ ജീവനക്കാരന്റെ ആറു വർഷത്തെ കരിയർ യാത്രയെ കുറിച്ചുള്ള കഥയാണ് ഇത്. 22,000 രൂപയുടെ ചെറിയ ശമ്പളത്തിൽ ആരംഭിച്ച യുവാവ്, പിന്നീട് പൊതുമേഖലാ സ്ഥാപനത്തിൽ എത്തിച്ചേരുന്നതിന്റെ അനുഭവങ്ങൾ പങ്കുവെച്ചിട്ടുണ്ട്. മധ്യപ്രദേശിലെ ഒരു ചെറിയ ഗ്രാമത്തിൽ വളർന്ന യുവാവ്, ഇപ്പോഴത്തെ ജോലിയിലേക്ക് എത്തുന്നതിന് മുമ്പ് നിരവധി സ്ഥാപനങ്ങളിൽ ജോലി ചെയ്തിട്ടുണ്ട്. ഡൽഹി യൂണിവേഴ്സിറ്റിയിൽ നിന്ന് ബികോം പൂർത്തിയാക്കിയ ശേഷം, 20-ാം വയസ്സിൽ ക്യാമ്പസ് പ്ലേസ്മെന്റിലൂടെ ആദ്യ ജോലി ലഭിച്ചു. '3.3 ലക്ഷം രൂപയായിരുന്നു വാർഷിക പാക്കേജ്, എന്നാൽ കൈയിൽ കിട്ടിയത് മാസത്തിൽ 22,000 രൂപയായിരുന്നു. ചെറിയ ഗ്രാമത്തിൽ നിന്നുള്ളതുകൊണ്ട്, ഗുരുഗ്രാമിലേക്ക് മാറി സ്വയം സമ്പാദിക്കുന്നത് വലിയ അനുഭവമായിരുന്നു. ആ ആദ്യ ശമ്പളം എനിക്ക് അനുഭവിച്ചറിയാത്ത സ്വാതന്ത്ര്യം നൽകി' എന്ന് യുവാവ് പറഞ്ഞു.

CAT പരീക്ഷയിൽ പരാജയപ്പെട്ടതോടെ, കരിയറിലെ ഏറ്റവും വലിയ റിസ്ക് എടുത്ത് ജോലി ഉപേക്ഷിച്ചു. ഒരു കേന്ദ്ര സർവകലാശാലയിൽ മാസ്സ് കമ്മ്യൂണിക്കേഷനിൽ ബിരുദാനന്തര ബിരുദത്തിന് ചേർന്നു. 'മൂന്നാം സെമസ്റ്ററിൽ, കൊവിഡിന്റെ നടുവിൽ, ഒരു പ്രമുഖ സ്ഥാപനത്തിൽ ക്യാമ്പസ് പ്ലേസ്മെന്റിനായി എത്തിയപ്പോൾ, എൺപതോളം വിദ്യാർത്ഥികളിൽ നിന്ന് രണ്ട് പേർ മാത്രം തിരഞ്ഞെടുക്കപ്പെട്ടു. ഭാഗ്യവശാൽ, ഞാൻ അതിൽ ഒരാളായിരുന്നു. 6.5 ലക്ഷം രൂപയായിരുന്നു പാക്കേജ്, കൈയിൽ കിട്ടിയത് ഏകദേശം 41,000 രൂപ.'