Secret Plan to Overthrow Iran Fails: ഇറാൻ ഭരണകൂടത്തെ അട്ടിമറിക്കാനുള്ള രഹസ്യ പദ്ധതി പാളി; മൊസാദ് തലപ്പത്ത് അഴിച്ചുപണി, ഉദ്യോഗസ്ഥർ പുറത്ത്

ജറുസലേം: ഇറാനിലെ ഇസ്‌ലാമിക് റിപ്പബ്ലിക് ഭരണകൂടത്തെ താഴെയിറക്കാനുള്ള ശ്രമം പരാജയപ്പെട്ടതിനെ തുടർന്ന്, ഇസ്രയേൽ ചാരസംഘടനയായ മൊസാദിൽ രണ്ട് മുതിർന്ന ഉദ്യോഗസ്ഥരെ നീക്കി. പുതിയ മൊസാദ് ഡയറക്ടർ റോമൻ ഗോഫ്‌മാൻ ഈ നടപടി സ്വീകരിച്ചിരിക്കുകയാണ്. ഇസ്രയേലിലെ ചാനൽ 12 റിപ്പോർട്ടുകൾ പ്രകാരം, ഈ ഉദ്യോഗസ്ഥർ ഇറാനിൽ ആഭ്യന്തര കലാപങ്ങൾ സൃഷ്ടിച്ച് ഭരണമാറ്റം വരുത്താനുള്ള തന്ത്രങ്ങൾ രൂപകൽപ്പന ചെയ്തവരായിരുന്നു. ഇസ്രയേലിന്റെ ലക്ഷ്യം, ഇറാനിലെ കുർദിഷ് വിഭാഗങ്ങൾക്കും മറ്റ് ന്യൂനപക്ഷങ്ങൾക്കുമൊപ്പം ചേർന്ന് രാജ്യത്തിനകത്ത് വലിയ തോതിലുള്ള കലാപം സൃഷ്ടിക്കുക എന്നതായിരുന്നു. പ്രത്യേകിച്ച്, ഇറാഖ് അതിർത്തിക്കടുത്തുള്ള കുർദിഷ് പ്രദേശത്തേക്ക് ശ്രദ്ധ കേന്ദ്രീകരിച്ചാണ് ഈ നീക്കങ്ങൾ ഉണ്ടായത്. പദ്ധതി പ്രകാരം, ഇറാന്റെ ഇസ്‌ലാമിക് റെവല്യൂഷണറി ഗാർഡ് കോറിന്റെ (IRGC) താവളങ്ങളിൽ ഇസ്രയേൽ വ്യോമാക്രമണം നടത്തുകയും, അതിലൂടെ കുർദിഷ് പോരാളികൾക്ക് ഇറാനിലേക്ക് കടന്നുവരാൻ അവസരം നൽകുകയും ചെയ്യുക എന്നായിരുന്നു ലക്ഷ്യം. ഈ മുന്നേറ്റത്തിൽ ആയിരക്കണക്കിന് കുർദിഷ് യുവാക്കൾ പങ്കുചേരുമെന്ന് മൊസാദ് ഉദ്യോഗസ്ഥർ കണക്കുകൂട്ടിയിരുന്നു, ഇത് പിന്നീട് രാജ്യത്തിന്റെ വിവിധ ഭാഗങ്ങളിൽ വ്യാപിക്കുന്ന വലിയ ജനകീയ പ്രക്ഷോഭമായി മാറുമെന്ന് പ്രതീക്ഷിച്ചിരുന്നു. നിലവിലെ ഭരണകൂടം തകർന്നാൽ, മുൻ ഇറാൻ പ്രസിഡന്റ് മഹ്മൂദ് അഹമ്മദി നെജാദിനെ പുതിയ ഭരണത്തലവനാക്കാനുള്ള പദ്ധതിയുണ്ടായിരുന്നുവെന്നും റിപ്പോർട്ടുകൾ സൂചിപ്പിക്കുന്നു. ഈ പദ്ധതിയുടെ ഭാഗമായി, ഹംഗറിയിൽ നടന്ന ഒരു അക്കാദമിക് കോൺഫറൻസിൽ, മുൻ മൊസാദ് തലവൻ ഡേവിഡ് ബാർണിയ അഹമ്മദി നെജാദുമായി കൂടിക്കാഴ്ച നടത്തിയതായും അറിയുന്നു.

എന്നാൽ, പദ്ധതിയുടെ രഹസ്യവിവരങ്ങൾ ചോർന്നതും കുർദിഷ് ഗ്രൂപ്പുകൾക്കിടയിലുണ്ടായ വിയോജിപ്പും ഇസ്രയേലിന് തിരിച്ചടിയായി. കുർദിഷ് മേഖലയിൽ ഇത്തരമൊരു നീക്കം നടക്കുന്നതിനെ തുർക്കി ശക്തമായി എതിർക്കുകയും ചെയ്തു. ഇറാൻ ഭരണകൂടം ഉടൻ തകരുമെന്ന ഇസ്രയേലിന്റെ വിലയിരുത്തലുകൾ അമിത പ്രതീക്ഷയാണെന്ന് അമേരിക്കൻ ഉദ്യോഗസ്ഥരും പ്രസിഡന്റ് ഡൊണാൾഡ് ട്രംപിന് മുന്നറിയിപ്പ് നൽകിയിരുന്നു. പദ്ധതിക്ക് ആവശ്യമായ പിന്തുണ ലഭിക്കാതെ വന്നതോടെ മൊസാദിന്റെ നീക്കങ്ങൾ പാളിപ്പോകുകയായിരുന്നു. ഇസ്രയേലിന്റെ ഈ നീക്കങ്ങൾ പരാജയപ്പെട്ടതിനെ തുടർന്ന്, രണ്ട് ഉദ്യോഗസ്ഥർക്കെതിരെയും അച്ചടക്ക നടപടിയല്ല സ്വീകരിച്ചതെന്നും, മറിച്ച് ഏജൻസിയിലെ പുനഃസംഘടനയുടെ ഭാഗമായി പരസ്പര സമ്മതത്തോടെയുള്ള മാറ്റമാണെന്നുമാണ് ഔദ്യോഗിക വിശദീകരണം. ഇവർ മൊസാദിൽ തന്നെ മറ്റ് പദവികളിൽ സേവനമനുഷ്ഠിക്കുമെന്നാണ് കരുതപ്പെടുന്നത്.