Messi kerala visit controversy:മെസിയേയും അർജന്റീന ടീമിനേയും കേരളത്തിലെത്തിക്കുന്നതുമായി ബന്ധപ്പെട്ട വിവാദം; കായികവകുപ്പ് അന്വേഷണറിപ്പോർട്ട് കൈമാറി

കഴിഞ്ഞ സർക്കാരിന്റെ കാലഘട്ടത്തിൽ ലിയോണൽ മെസിയേയും അർജന്റീനാ ടീമിനേയും കേരളത്തിലേക്ക് കൊണ്ടുവരുന്നതുമായി ബന്ധപ്പെട്ട വിവാദത്തിൽ, കായികവകുപ്പ് നടത്തിയ അന്വേഷണത്തിന്റെ റിപ്പോർട്ട് കൈമാറി. ഈ റിപ്പോർട്ട് മുഖ്യമന്ത്രിക്ക് കൈമാറിയതായി കായിക മന്ത്രി ഒ ജെ ജനീഷ് അറിയിച്ചു. റിപ്പോർട്ട് രഹസ്യസ്വഭാവമുള്ളതായും, കൂടുതൽ അന്വേഷണം നടത്തേണ്ടതുണ്ടെന്നും അദ്ദേഹം പറഞ്ഞു. ഈ വിഷയത്തിൽ സർക്കാർ ഉചിതമായ നടപടി സ്വീകരിക്കുമെന്ന് കായിക മന്ത്രി ഉറപ്പു നൽകി.

മുൻ കായിക മന്ത്രി വി അബ്ദുറഹ്‌മാൻ ആണ്, മെസിയെ കേരളത്തിൽ എത്തിക്കുമെന്ന് പ്രഖ്യാപിച്ചിരുന്നത്. അദ്ദേഹം സ്പെയിനിൽ അർജന്റീനയുടെ അധികൃതരുമായി കൂടിയാലോചിച്ച ശേഷം ഈ പ്രഖ്യാപനം നടത്തുകയായിരുന്നു. എന്നാൽ, മന്ത്രിയുടെ യാത്ര സർക്കാർ ഖജനാവിൽ വലിയ നഷ്ടം ഉണ്ടാക്കിയതായി ആരോപണം ഉയർന്നിരുന്നു. മെസിയെ കേരളത്തിലേക്ക് കൊണ്ടുവരാൻ 126 കോടി രൂപ ചെലവഴിക്കേണ്ടതുണ്ടെന്ന് ഒരു സ്പോൺസർ അവകാശപ്പെടുകയും, എന്നാൽ ഈ തുക ജിഎസ്ടി അടച്ചിട്ടില്ല എന്ന വിവാദം ഉയർന്നതോടെ, ഈ വിഷയത്തിൽ വീണ്ടും ശ്രദ്ധ കേന്ദ്രീകരിക്കപ്പെട്ടു.

കായിക വകുപ്പ് സെക്രട്ടറിയാണ് ഈ റിപ്പോർട്ട് മന്ത്രിക്ക് നൽകിയത്, ഇത് ഇപ്പോൾ മുഖ്യമന്ത്രി കൈമാറിയിട്ടുണ്ട്. റിപ്പോർട്ടിൽ ഗുരുതരമായ ആരോപണങ്ങൾ ഉണ്ട്, പ്രത്യേകിച്ച് വ്യക്തമായ കരാറില്ല എന്നത് പ്രധാന കണ്ടെത്തലാണ്. കഴിഞ്ഞ നവംബർ 17-ന് കേരളത്തിൽ ഒരു മത്സരം നടക്കുമെന്ന് സ്പോൺസർമാരും സംസ്ഥാന സർക്കാരും മുമ്പ് പ്രഖ്യാപിച്ചിരുന്നു. അർജന്റീന കൊച്ചിയിൽ എത്തി ഓസ്ട്രേലിയയുമായി സൗഹൃദ മത്സരം കളിക്കുമെന്നാണ് സംഘാടകർ അറിയിച്ചിരുന്നത്. എന്നാൽ, ഇന്ത്യയിൽ ഇങ്ങനെയൊരു മത്സരത്തിനിറങ്ങുന്നതായി അർജന്റീനയുടെയോ ഓസ്ട്രേലിയയുടെയോ ഫുട്ബോൾ അസോസിയേഷനുകൾ സ്ഥിരീകരിച്ചിട്ടില്ല.