Return of Hills Fish:ഗംഗാ നദിയിലേക്ക് ഹിൽസ മത്സ്യം തിരിച്ചെത്തി

ലഖ്നൗ: പതിറ്റാണ്ടുകളോളം കാത്തിരിപ്പിന് ശേഷം, ഗംഗാ നദിയിലേക്ക് ഹിൽസ മത്സ്യം തിരിച്ചെത്തിയതായി റിപ്പോർട്ട് ചെയ്യുന്നു. ഉത്തർപ്രദേശിലെ ഗാസിപുരിന് സമീപം ഗംഗയിൽ ഈ ആഴ്ച രണ്ട് ഹിൽസ മത്സ്യങ്ങൾ കണ്ടെത്തിയതായി ഗവേഷകർ അറിയിച്ചു. 1970-കളിൽ പശ്ചിമ ബംഗാളിലെ ഫറാക്ക് ബാരേജ് നിർമ്മിച്ചതിന് ശേഷം, ഗംഗയുടെ മുകളിൽ ഹിൽസയുടെ പ്രജനനത്തിന് ആവശ്യമായ ദേശാടനം തടസ്സപ്പെട്ടു. സമുദ്രജലത്തിൽ ജീവിക്കുകയും, പ്രജനനത്തിനായി നദികളിലേക്ക് ദേശാടനം നടത്തുകയും ചെയ്യുന്ന ഈ മത്സ്യം, ഫറാക്ക് ബാരേജ് നിർമ്മിച്ചതോടെ പ്രയാഗ്‌രാജ്, ആഗ്ര തുടങ്ങിയ സ്ഥലങ്ങളിൽ നിന്നും പൂർണ്ണമായും അപ്രത്യക്ഷമായിരുന്നു. ഇത് ഈ പ്രദേശത്തെ മത്സ്യത്തൊഴിലാളികളുടെ ജീവിതത്തിൽ വലിയ പ്രതിസന്ധി സൃഷ്ടിച്ചു. എന്നാൽ, ഇപ്പോൾ ഹിൽസയുടെ ഈ മടങ്ങിവരവിന് കാരണമായത്, ഫെബ്രുവരിയിൽ ഫറാക്ക് ബാരേജിൽ സ്ഥാപിച്ച പുതിയ ഫിഷ് ലോക്ക് ഗേറ്റ് ആണ്. നമാമി ഗംഗേ പദ്ധതിയുടെ ഭാഗമായാണ് ഈ ഫിഷ് പാസ് നിർമ്മിച്ചത്, ഇത് മത്സ്യങ്ങൾക്ക് ബാരേജ് മറികടന്ന് നദിയുടെ മുകളിൽ സഞ്ചരിക്കാൻ സഹായിക്കുന്നു. ഗാസിപുരിൽ നടന്ന കണ്ടെത്തലുകൾ ഈ ഫിഷ് പാസിന്റെ ഫലപ്രാപ്തി സൂചിപ്പിക്കുന്നു. ഐസിഎആർ-സെൻട്രൽ ഇൻലാൻഡ് ഫിഷറീസ് റിസർച്ച് ഇൻസ്റ്റിറ്റ്യൂട്ടിലെ ശാസ്ത്രജ്ഞർ ഈ കണ്ടെത്തലിന് പിന്നിൽ പ്രവർത്തിക്കുന്നു. ഡയറക്ടർ ബസന്ത കുമാർ ദാസിന്റെ നേതൃത്വത്തിലുള്ള സംഘം ഫിഷ് പാസിന്റെ സ്വാധീനം പഠിക്കാനെത്തിയപ്പോൾ, പ്രാദേശിക മത്സ്യത്തൊഴിലാളികൾ പിടിച്ച മത്സ്യങ്ങളെ പരിശോധിച്ചപ്പോൾ, അവ ഹിൽസ മത്സ്യങ്ങളാണെന്ന് സ്ഥിരീകരിച്ചു. പിടികൂടിയ മത്സ്യങ്ങളിൽ ഒന്നിന് 450 ഗ്രാം, മറ്റൊന്നിന് 510 ഗ്രാം ഭാരമുണ്ടായിരുന്നു. ഫറാക്ക് ബാരേജിൽ നിന്ന് ഏകദേശം 700 കിലോമീറ്റർ മുകളിലായാണ് ഗാസിപുര്‍ സ്ഥിതി ചെയ്യുന്നത്. ഈ ദൂരം ഹിൽസ സഞ്ചരിച്ചെത്തിയത്, ഫിഷ് പാസ് വിജയകരമാണെന്നതിന്റെ തെളിവാണ്. ജലത്തിന്റെ ഒഴുക്ക് നിയന്ത്രിച്ച് മത്സ്യങ്ങളെ ആകർഷിക്കുന്ന രീതിയിൽ ഫിഷ് പാസ് പ്രവർത്തിക്കുന്നു. കൂടുതൽ ഹിൽസ മത്സ്യങ്ങൾ ഗംഗയുടെ മുകളിൽ എത്തുന്നുണ്ടോയെന്ന് നിരീക്ഷിക്കുകയാണ് ഗവേഷകർ. ഹിൽസയുടെ ഈ തിരിച്ചുവരവ് ഗംഗയുടെ ആവാസവ്യവസ്ഥയ്ക്ക് മാത്രമല്ല, ആയിരക്കണക്കിന് മത്സ്യത്തൊഴിലാളികളുടെ ഉപജീവനത്തിനും പുതിയ പ്രതീക്ഷ നൽകുന്നു.