Oil companies support E20 petrol:ഇ20 പെട്രോളിനെ അനുകൂലിച്ച് എണ്ണക്കമ്പനികൾ; വിൽക്കുന്നത് ഗുണമേന്മയുള്ള ഇന്ധനമെന്ന് വിശദീകരണം

മുംബൈ: രാജ്യത്തെ പമ്പുകളിൽ വിൽക്കുന്ന ഇ20 പെട്രോൾ ഗുണമേന്മയുടെ മാനദണ്ഡങ്ങൾ പാലിക്കുന്നുവെന്ന് എണ്ണക്കമ്പനികൾ വ്യക്തമാക്കിയിട്ടുണ്ട്. കഴിഞ്ഞ രണ്ടാഴ്ചയായി രാജ്യവ്യാപകമായി പമ്പുകളിലും റിഫൈനറികളിലും എഥനോൾ ഡിസ്റ്റിലറികളിലും എടുത്ത സാംപിളുകൾ പരിശോധിച്ച ശേഷമാണ് ഇന്ത്യൻ ഓയിൽ കോർപ്പറേഷൻ, ഭാരത് പെട്രോളിയം കോർപ്പറേഷൻ, ഹിന്ദുസ്ഥാൻ പെട്രോളിയം കോർപ്പറേഷൻ എന്നിവയുടെ സംയുക്ത പ്രസ്താവനയിലൂടെ ഈ വിവരം പുറത്തുവിട്ടത്. കഴിഞ്ഞ ദിവസങ്ങളിൽ പമ്പുകളിൽ ലഭിക്കുന്ന ഇ20 പെട്രോളിൽ ജലാംശം കലരുന്നതും ഉയർന്ന ക്ലോറൈഡ് സാന്നിധ്യമുണ്ടെന്നുള്ള റിപ്പോർട്ടുകൾ വന്നതിനെ തുടർന്ന് കമ്പനികൾ പരിശോധന ആരംഭിച്ചു. രണ്ടാഴ്ചയിൽ നടത്തിയ പരിശോധനയിൽ, മൂന്നോ നാലോ സാംപിളുകളിൽ മാത്രമാണ് ക്ലോറൈഡ് ഉയർന്നതെന്ന് കമ്പനികൾ വ്യക്തമാക്കിയിട്ടുണ്ട്. ഈ സാഹചര്യത്തിൽ, അപ്പോൾ തന്നെ അവയുടെ വിതരണം നിർത്തിവെച്ചതായി അവർ അറിയിച്ചു.

എഥനോൾ ചേർക്കുന്ന പെട്രോളിൽ ക്ലോറൈഡിന്റെ അളവിനെ കുറിച്ച് സർക്കാർ കൃത്യമായ മാർഗനിർദേശങ്ങൾ നൽകിയിട്ടുണ്ട്. റിഫൈനറികൾ, ഡിസ്റ്റിലറികൾ, ഡിപ്പോകൾ, ടെർമിനലുകൾ, റീട്ടെയിൽ ഔട്ട്ലെറ്റുകൾ എന്നിവിടങ്ങളിൽ ഈ കാര്യത്തിൽ നിരീക്ഷണം ശക്തമാക്കിയിട്ടുണ്ട്. എല്ലാ പെട്രോൾ പമ്പുകളിലും ഇന്ധനത്തിലെ ജലസാന്നിധ്യവും സാന്ദ്രതാ പരിശോധനയും ദിവസത്തിൽ എട്ടുമുതൽ 12 തവണ വരെ നടത്തപ്പെടുന്നു. ഇതിനായി ഇന്ധന ഗുണമേന്മ പരിശോധനാ ലബോറട്ടറികൾ സജ്ജമാക്കിയിട്ടുണ്ട്. നിലവിലെ പരിശോധനകളിൽ ക്ലോറൈഡ് സാന്നിധ്യം ഒരു പി.പി.എമ്മിൽ (പാർട്‌സ് പെർ മില്യൺ) താഴെയാണ്.