Human Trafficking Case in Pune: 1.5 ലക്ഷം ശമ്പളം വാഗ്ദാനം ചെയ്ത് യുവതിയെ പോർച്ചുഗലിൽ എത്തിച്ച് വിറ്റു

പുണ: വിദേശത്ത് ജോലി വാഗ്ദാനം ചെയ്ത് നാഗ്പൂർ സ്വദേശിയായ യുവതിയെ തട്ടിപ്പിനിരയാക്കി പോർച്ചുഗലിൽ വിറ്റതായി പരാതി ലഭിച്ചു. 11 ലക്ഷം രൂപ തട്ടിയെടുക്കുകയും ലൈംഗിക ചൂഷണത്തിന് ഇരയാക്കുകയും ചെയ്തുവെന്നാണ് ആരോപണം. മനുഷ്യക്കടത്ത് സംഘത്തിനെതിരെ പുണെ പോലീസ് കേസെടുത്തിട്ടുണ്ട്. നാഗ്പൂർ സ്വദേശിയായ 28-കാരിയായ കൊമേഴ്‌സ് ബിരുദധാരിയാണ് തട്ടിപ്പിന്റെ ഇരയായത്. 'വി മൈഗ്രേറ്റ്' എന്ന റിക്രൂട്ട്‌മെന്റ് ഏജൻസിയാണ് യുവതിയെ തട്ടിയെടുത്തതെന്ന് റിപ്പോർട്ടുകൾ പറയുന്നു. ഈ ഏജൻസി സോഷ്യൽ മീഡിയ വഴി യുവതിയെ ആകർഷിച്ചുവെന്നാണ് വിവരം. യൂറോപ്പിലെ ഒരു ചോക്ലേറ്റ് കമ്പനിയിൽ ജോലി വാഗ്ദാനം ചെയ്ത് പ്രതിമാസം 1.5 ലക്ഷം രൂപ ശമ്പളത്തിൽ ജോലി നൽകാമെന്ന് ഏജൻസി വാഗ്ദാനം ചെയ്തിരുന്നു. വിസ, ഇൻഷുറൻസ്, പ്രൊസസിങ് ഫീസ് എന്നിവയ്ക്കായി 11 ലക്ഷം രൂപ പ്രതികൾ ആവശ്യപ്പെടുകയും, യുവതി ഭർത്താവിന്റെയും ബന്ധുക്കളുടെയും ഫിക്സഡ് ഡെപ്പോസിറ്റുകൾ പിൻവലിച്ച് ഈ തുക ഏജൻസിക്ക് നൽകുകയും ചെയ്തു. 2026 മെയ് മാസത്തിൽ സ്പെയിൻ വഴി യുവതിയെ പോർച്ചുഗലിലേക്ക് കൊണ്ടുപോയെങ്കിലും, അവിടെ എത്തുന്ന ഉടനെ ഇടനിലക്കാർ യുവതിയുടെ പാസ്‌പോർട്ട് പിടിച്ചെടുത്തു. പിന്നീട്, ഒഡെമിറ എന്ന സ്ഥലത്തുള്ള ഒരു ബീയർ ഷോപ്പിൽ യുവതിയെ വിറ്റതായി പരാതിയിൽ പറയുന്നു. സൂപ്പർമാർക്കറ്റ് ജോലിക്ക് പകരം ബീയർ ഷോപ്പിൽ അടിമപ്പണിയിലായിരുന്ന യുവതി, ലൈംഗിക ചൂഷണത്തിന് വിധേയമായതായും അവിടെ തടവിലായ മറ്റു ചില ഇന്ത്യൻ യുവതികൾ സമാനമായ ദുരിതം അനുഭവിച്ചുവെന്നും പറയുന്നു. ജൂൺ 29-ന്, തടവിൽ നിന്ന് രക്ഷപ്പെട്ട യുവതി ബസ് വഴി മാഡ്രിഡിലേക്ക് എത്തുകയും, അവിടെനിന്ന് ദോഹ വഴി ദില്ലിയിലേക്ക് വിമാനമാർഗം എത്തുകയും ചെയ്തു. നാട്ടിലെത്തിയശേഷം, മറ്റൊരു രാജ്യത്ത് ജോലി നൽകാമെന്ന് പറഞ്ഞ് പ്രതികൾ 3 ലക്ഷം രൂപ കൂടി ആവശ്യപ്പെടുകയും ഭീഷണിപ്പെടുത്തുകയും ചെയ്തുവെന്നാണ് യുവതിയുടെ പരാതിയിൽ പറയുന്നത്. തുടർന്ന്, യുവതി പുണെ സിറ്റി പോലീസിലും ക്രൈംബ്രാഞ്ചിലും പരാതി നൽകി. സംഭവത്തിൽ ഇന്ത്യയിലും പോർച്ചുഗലിലുമുള്ള പ്രതികൾക്കെതിരെ ഭാരതീയ ന്യായ സംഹിതയിലെ മനുഷ്യക്കടത്ത്, തടഞ്ഞുവെക്കൽ, തട്ടിപ്പ്, ഭീഷണിപ്പെടുത്തൽ തുടങ്ങിയ വകുപ്പുകൾ പ്രകാരം പോലീസ് കേസെടുത്ത് അന്വേഷണം ആരംഭിച്ചിട്ടുണ്ട്.