Energy Drinks and Heart Risks:എനർജി ഡ്രിങ്കുകളും ഹൃദയാഘാതസാധ്യത കൂട്ടും, കരുതലില്ലെങ്കിൽ അപകടം ഉറപ്പ്

ഹൃദയാഘാത സാധ്യത വർധിപ്പിക്കുന്നതിൽ മദ്യപാനത്തിന്റെ പങ്കിനെക്കുറിച്ച് നിരന്തരം ചർച്ചകൾ നടക്കുന്നുണ്ട്. എന്നാൽ, മദ്യം മാത്രമല്ല, എനർജി ഡ്രിങ്കുകളും ഹൃദയാഘാത സാധ്യത കൂട്ടുന്നതായി ടെക്സസിലെ ഹൃദ്രോഗ വിദഗ്ധനായ ഡോ. ജയിംസ് സ്റ്റോൺ പറയുന്നു. അമേരിക്കൻ ബിവറേജ് അസോസിയേഷൻ നൽകിയ റിപ്പോർട്ടിൽ, 8.4 ഔൺസ് എനർജി ഡ്രിങ്ക് കാനിൽ ഏകദേശം 80 മില്ലിഗ്രാം കഫീൻ അടങ്ങിയിരിക്കുന്നുവെന്നും അദ്ദേഹം വ്യക്തമാക്കി. കഫീനോടൊപ്പം മറ്റ് ഉത്തേജക ഘടകങ്ങൾ ചേർന്ന് ഉപയോഗിക്കുന്നത് അപകടകരമാണെന്നും ഡോക്ടർ പറഞ്ഞു. ഇവയെല്ലാം ശരീരത്തിൽ സമ്മർദം സൃഷ്ടിക്കുകയും, എനർജി ഡ്രിങ്കുകളിൽ കഫീനും പഞ്ചസാരയ്ക്കുമൊപ്പം ടോറിൻ, ഗ്വാറാന, എൽ-കാർണിറ്റൈൻ പോലുള്ള ഉത്തേജകങ്ങൾ അടങ്ങിയിരിക്കുന്നതിനാൽ, അമിതമായി ഉപയോഗിച്ചാൽ ക്രമരഹിതമായ ഹൃദയമിടിപ്പിന് കാരണമാകുന്നുവെന്ന് അദ്ദേഹം കൂട്ടിച്ചേർത്തു. ഈ ഘടകങ്ങൾ ഹൃദ്രോഗികളിൽ എനർജി ഡ്രിങ്കുകൾ കൂടുതൽ അപകടകരമാക്കുന്നുവെന്നും ഡോക്ടർ പറഞ്ഞു.

നിരന്തരം എനർജി ഡ്രിങ്കുകൾ ഉപയോഗിക്കുന്നത് ക്രമരഹിതമായ ഹൃദയമിടിപ്പും, പെട്ടെന്നുള്ള ഹൃദയാഘാതത്തിനും, മരണത്തിനും കാരണമാകുകയും ചെയ്യുന്നു. ആരോഗ്യകരമായ ആളുകൾക്കിടയിലും എനർജി ഡ്രിങ്കുകൾ ഉപയോഗിച്ചശേഷം ഹൃദയമിടിപ്പ് കൂടുന്നതായി കണ്ടെത്തിയിട്ടുണ്ടെന്നും ഡോ. ജയിംസ് പറഞ്ഞു. മധുരവും രുചിയുമുള്ളതിനാൽ, ഇവയോട് അടിമപ്പെടാൻ സാധ്യത കൂടുതലാണെന്നും അദ്ദേഹം കൂട്ടിച്ചേർത്തു. വളരെ കുറഞ്ഞ അളവിൽ വിറ്റാമിനുകൾ, രുചിയും നിറവും ലഭിക്കുന്നതിനുള്ള രാസവസ്തുക്കളും കൃത്രിമവസ്തുക്കളും ധാരാളം അടങ്ങിയ, ഉന്മേഷം പ്രദാനം ചെയ്യാൻ ഉയർന്ന തോതിൽ കഫീനടങ്ങിയ പാനീയങ്ങളാണിവ. കുടിക്കുന്ന സമയത്ത് ഊർജവും ഉന്മേഷവും തോന്നുന്നതൊഴിച്ചാൽ, ദീർഘകാല ഉപയോഗത്തിലൂടെ ഗുരുതര ആരോഗ്യ പ്രശ്നങ്ങൾ ഉണ്ടാകാൻ സാധ്യതയുണ്ട്.