New Bridge on Al Khudr Road:അൽ ഖുദ്ര റോഡിൽ പുതിയപാലം

ദുബായിലെ അൽ ഖുദ്ര റോഡും ശൈഖ് സായിദ് ബിൻ ഹംദാൻ അൽ നഹ്യാൻ സ്ട്രീറ്റും ചേരുന്ന ജങ്ഷനിൽ പുതിയ നാലുവരിപ്പാലം ദുബായ് റോഡ്‌സ് ആൻഡ് ട്രാൻസ്‌പോർട്ട് അതോറിറ്റി (ആർ.ടി.എ.) ഉദ്ഘാടനം ചെയ്തു. അൽ ഖുദ്ര റോഡ് വികസന പദ്ധതിയുടെ ഭാഗമായാണ് ഈ ജങ്ഷന്റെ തെക്കുഭാഗത്ത് 700 മീറ്റർ നീളമുള്ള പുതിയ പാലം നിർമ്മിച്ചത്. മണിക്കൂറിൽ 6,000 വാഹനങ്ങൾക്ക് സഞ്ചരിക്കാൻ കഴിയുന്ന ഈ പാലം, അൽ ഖുദ്ര സിറ്റിയിലേക്കുള്ള ഗതാഗതം കൂടുതൽ സുഗമമാക്കും. കഴിഞ്ഞ ഫെബ്രുവരിയിൽ എതിർവശത്തെ പാലം തുറന്നിരുന്നു.

അൽ ഖുദ്ര റോഡ് വികസന പദ്ധതി പൂർത്തിയാകുമ്പോൾ യാത്രാസമയം 9.4 മിനിറ്റിൽനിന്ന് 2.8 മിനിറ്റായി കുറയും. ജങ്ഷന്റെ ശേഷി, മണിക്കൂറിൽ 7,800 വാഹനങ്ങളിൽനിന്ന് 19,400 വാഹനങ്ങളായി ഉയരും. കാത്തിരിപ്പ് സമയം 85 ശതമാനം കുറയുകയും, ഏഴു മിനിറ്റിൽനിന്ന് വെറും ഒരു മിനിറ്റായി ചുരുങ്ങുകയും ചെയ്യും. അറേബ്യൻ റാഞ്ചസ്, ദുബായ് മോട്ടോർ സിറ്റി, ദുബായ് സ്റ്റുഡിയോ സിറ്റി, മദോൻ, ഡമാക് ഹിൽസ് തുടങ്ങിയ 4,00,000-ത്തിലധികം താമസക്കാരും സന്ദർശകരുമുള്ള പ്രധാന റസിഡൻഷ്യൽ മേഖലകൾക്ക് ഈ പദ്ധതിയുടെ പ്രയോജനം ലഭിക്കും.

ജങ്ഷനിലെ സൈഡ് റാംപ് പാലങ്ങൾ 2026 അവസാനത്തോടെ തുറക്കുമെന്ന് പ്രതീക്ഷിക്കുന്നു. അൽ ഖുദ്ര റോഡിൽനിന്ന് ജെബൽ അലി ഭാഗത്തേക്കും ഡൗൺടൗൺ ദുബായ്/ദുബായ് അന്താരാഷ്ട്ര വിമാനത്താവളം ഭാഗത്തേക്കുമുള്ള യാത്രാക്കുരുക്ക് പൂർണമായും ഒഴിവാക്കാൻ ഈ പുതിയ പാലം സഹായിക്കും. 4,000 മീറ്റർ നീളമുള്ള വിവിധ പാലങ്ങളുടെ നിർമാണവും 11.6 കിലോമീറ്റർ ദൂരമുള്ള അൽ ഖുദ്ര റോഡിന്റെ വികസനവും ഈ പദ്ധതിയുടെ ഭാഗമാണ്. ദുബായിലെ അതിവേഗ നഗരവത്കരണത്തിനും ജനസംഖ്യാ വളർച്ചയ്ക്കും അനുസൃതമായി റോഡ് ശൃംഖലയുടെ അടിസ്ഥാന സൗകര്യങ്ങൾ മെച്ചപ്പെടുത്തുന്നതിന്റെ ഭാഗമായാണ് അൽ ഖുദ്ര റോഡ് വികസന പദ്ധതി നടപ്പിലാക്കുന്നതെന്ന് ആർ.ടി.എ. ചെയർമാൻ മത്തർ അൽ തായർ പറഞ്ഞു. ദുബായ് 2040 നഗര മാസ്റ്റർ പ്ലാനിന്റെ ലക്ഷ്യങ്ങൾക്ക് അനുസൃതമായി സുസ്ഥിരമായ ഗതാഗതസംവിധാനങ്ങൾ നൽകാനാണ് ആർ.ടി.എ. ലക്ഷ്യമിടുന്നതെന്നും അദ്ദേഹം വ്യക്തമാക്കി.