3D Printing Houses in 60 Days:60 ദിവസം കൊണ്ട് ഒരു വീട്: മലയാളി പ്രയോജനപ്പെടുത്താത്ത കോൺക്രീറ്റ് ത്രിഡി പ്രിന്റിങ്

വിവിധ രൂപങ്ങളിലെയും ഡിസൈനുകളിലെയും വീടുകൾ പ്രിന്റ് ചെയ്യാനുള്ള സാങ്കേതിക വിദ്യയെക്കുറിച്ചാണ് ഈ ലേഖനം. ഇത് ഫ്രെയിം ചെയ്ത പ്രിന്റുകളെക്കുറിച്ചല്ല, മറിച്ച് നമുക്ക് താമസിക്കാവുന്ന വീടുകൾ പ്രിന്റ് ചെയ്യുന്നതിനെക്കുറിച്ചാണ്. കോൺക്രീറ്റ് ഉപയോഗിച്ച് വളരെ എളുപ്പത്തിൽ വീടുകൾ നിർമ്മിക്കാനുള്ള ഈ സാങ്കേതിക വിദ്യ നമ്മുടെ നാട്ടിൽ ഏറെക്കാലം മുമ്പേ പ്രചാരത്തിലുണ്ട്. വിദേശ രാജ്യങ്ങളിൽ ത്രിഡി പ്രിന്റിങ് ഉപയോഗിച്ച് വീടുകളും കെട്ടിടങ്ങളും നിർമ്മിക്കുന്നത് സാധാരണമാണ്. തൃശൂരിലെ കോൺഫേസ് എന്ന സ്ഥാപനമാണ് കേരളത്തിൽ ഈ സാങ്കേതിക വിദ്യ ഉപയോഗിച്ച് നിർമ്മാണം നടത്തുന്ന ഏക സ്ഥാപനമായി അറിയപ്പെടുന്നത്. 1939-ൽ ആദ്യമായി ഈ നിർമ്മാണ രീതിയെക്കുറിച്ചുള്ള ആശയം രൂപംകൊണ്ടു. 2010-ൽ ചൈനയിൽ കോൺക്രീറ്റ് പ്രിന്റിങ് ഉപയോഗിച്ച് ഒരു കെട്ടിടം നിർമ്മിച്ചു. 2016-ൽ ദുബായിയിൽ ആധുനിക രീതിയിലുള്ള ത്രിഡി കോൺക്രീറ്റ് പ്രിന്റിങ് കെട്ടിടം വെറും 17 ദിവസത്തിനുള്ളിൽ നിർമ്മിച്ചു. ആദ്യം, കംമ്പ്യൂട്ടറിൽ ഇഷ്ടമുള്ള ഡിസൈൻ വരയ്ക്കുകയും, പിന്നീട് സോഫ്റ്റ്വെയറിന്റെ സഹായത്തോടെ റോബോട്ടിക് മെഷീനുകൾ ഉപയോഗിച്ച് ലെയറുകളായി പ്രിന്റ് ചെയ്യുകയും ചെയ്യുന്നു. ഈ സ്ട്രക്ചറുകൾ ഉണങ്ങിയ ശേഷം ക്രെയിനുകൾ ഉപയോഗിച്ച് ആവശ്യമായിടത്തേക്ക് മാറ്റാം. വലിയ സ്‌ട്രെക്ചറുകൾ ഉണ്ടെങ്കിൽ, റോബോട്ടിക് മെഷീനുകളെ സൈറ്റിൽ എത്തിച്ചാണ് പ്രിന്റ് ചെയ്യുന്നത്. പ്രിന്റിങ് ചെയ്യാൻ പ്രത്യേക തരം കോൺക്രീറ്റ് മിക്‌സ് ഉപയോഗിക്കുന്നു, അതിൽ സിമന്റ്, മണൽ, കല്ലുകൾ എന്നിവ ഉൾപ്പെടുന്നു. ചെറിയ സ്ട്രക്ചറുകൾ കോൺഫേസിൽ തന്നെ നിർമ്മിച്ച് ക്രെയിനുകൾ ഉപയോഗിച്ച് ആവശ്യമായിടത്തേക്ക് മാറ്റുന്നു. എന്നാൽ, വീടുകൾ പോലെയുള്ള വലിയ സ്ട്രക്ചറുകൾ നിർമ്മിക്കാൻ റോബോട്ടിക് പ്രിന്റർ സൈറ്റിൽ എത്തിച്ചാണ് നിർമ്മാണം നടത്തുന്നത്. തൃശ്ശൂരിലെ മുണ്ടൂരിലാണ് കോൺഫേസ് പ്രവർത്തിക്കുന്നത്. സണ്ണി ഡേവിസ് ആണ് ഈ സ്ഥാപനം സ്ഥാപിച്ചത്. നിർമ്മാണ രംഗത്ത് ദീർഘകാലമായി പ്രവർത്തിക്കുന്ന സണ്ണി, ഈ മേഖലയിലെ വെല്ലുവിളികളെ മനസിലാക്കിയതോടെയാണ് കോൺക്രീറ്റ് ത്രിഡി പ്രിന്റിങ്ങിനെക്കുറിച്ച് ചിന്തിച്ചത്. ഇതിന്റെ സാധ്യതകൾ മനസിലാക്കിയതോടെ, സ്വന്തം നാട്ടിൽ കോൺഫേസ് ആരംഭിക്കാൻ തീരുമാനിച്ചു. ഇന്ന്, കേരളത്തിന്റെ വിവിധ ഭാഗങ്ങളിലേക്കും കോൺഫേസിൽ പ്രിന്റ് ചെയ്ത ഉൽപ്പന്നങ്ങൾ എത്തുന്നു. വെറും അറുപത് ദിവസത്തിനുള്ളിൽ ഒരു വീട് നിർമ്മിക്കാമെന്ന് സണ്ണി ഡേവിസ് പറയുന്നു. സ്‌ക്വയർഫീറ്റിന് 3000 രൂപയാണ് ഏകദേശം ചിലവ് വരുന്നത്. വീട് ഉണ്ടാക്കാൻ ഉദ്ദേശിക്കുന്ന സ്ഥലത്തിന്റെ ദൂരം എന്നിവ അനുസരിച്ച് ഈ നിരക്ക് മാറാം. സാധാരണ നിർമ്മാണ രീതിയിലും ഈ ചിലവ് വരും, എന്നാൽ വേഗത്തിൽ വീട് പണി പൂർത്തിയാക്കാൻ കഴിയുന്ന പ്രത്യേകതയാണ് ഇത്. ചൂടിനെ ചെറുക്കാൻ കഴിയുന്ന രീതിയിലാണ് നിർമ്മാണം. അന്യ സംസ്ഥാന തൊഴിലാളികളെ ആശ്രയിച്ചാണ് കേരളത്തിലെ നിർമ്മാണ മേഖല മുന്നോട്ട് പോകുന്നത്. ഈ സാഹചര്യത്തിൽ, കോൺക്രീറ്റ് ത്രിഡി പ്രിന്റിങ്ങിന്റെ പ്രസക്തി വളരെ കൂടുതലാണ്. നിർമ്മാണ തൊഴിലാളികളെ പരമാവധി കുറച്ച്, ഒരു വീട് മുഴുവനായോ, അതിന്റെ ഏതെങ്കിലും ഭാഗം മാത്രമായോ പ്രിന്റ് ചെയ്യാം. ഫ്‌ളവർ ഫേസ്, ബെഞ്ച് കട്ടിൽ, ഇഷ്ടപ്പെട്ട ഡിസൈനിൽ എന്തും പ്രിന്റ് ചെയ്യാൻ കഴിയും. കേരളത്തിൽ ഇതുവരെ ഈ സാങ്കേതിക വിദ്യ ഉപയോഗിച്ച് വീടുകൾ നിർമ്മിച്ചിട്ടില്ല, പക്ഷേ കോൺഫേസിൽ പോയാൽ ത്രിഡി പ്രിന്റിങ് ഉപയോഗിച്ച് നിർമ്മിച്ച ബാത്ത്‌റൂം കാണാം.