Self-Agitating Well in Gujarat:ഗുജറാത്തിൽ 'സ്വയം ഇളകുന്ന കിണർ വെള്ളം', കാരണം കണ്ടെത്താൻ ജില്ലാ ഭരണകൂടം, വീഡിയോ

ഗുജറാത്തിലെ മോർബി ജില്ലയിൽ സ്ഥിതിചെയ്യുന്ന വിർപാർദ ഗ്രാമത്തിലെ ഒരു കിണർ വീണ്ടും ശ്രദ്ധേയമായ സംഭവമായി മാറിയിട്ടുണ്ട്. ഇവിടെ കിണറിലെ വെള്ളം യാതൊരു ബാഹ്യ ഇടപെടലുകളും ഇല്ലാതെ തന്നെ സ്വയം ഇളകുന്നത് നാട്ടുകാരുടെ ശ്രദ്ധയിൽപ്പെട്ടതോടെ ഈ സംഭവം വീണ്ടും വാർത്തകളിൽ ഇടം പിടിച്ചു. കഴിഞ്ഞ കുറച്ച് ദിവസങ്ങളായി സമാനമായ ഒരു പ്രതിഭാസം ഉണ്ടായിരുന്നുവെങ്കിലും പിന്നീട് കിണർ വെള്ളത്തിന്റെ ചലനം നിർത്തിയിരുന്നു. ഇപ്പോഴത്തെ അവസ്ഥയിൽ, കിണറിലെ വെള്ളം വീണ്ടും അതിശക്തമായി ചലിക്കുന്നത് നാട്ടുകാരെ അത്ഭുതപ്പെടുത്തുകയും ഭയപ്പെടുത്തുകയും ചെയ്തു. കഴിഞ്ഞ വ്യാഴാഴ്ച ഉച്ചയോടു കൂടിയാണ് ഈ അസാധാരണമായ ചലനം വീണ്ടും കണ്ടെത്തിയത്. കിണർ ഒരു വിശാലമായ പാടത്തിൽ നിർമ്മിച്ചിരിക്കുന്നു, ഇവിടെ വെള്ളം ശക്തമായി തിരയിടുന്നത് വ്യക്തമായി കാണാം. ചില സമയങ്ങളിൽ, കിണറിന്റെ അരമതിയിൽ കടന്നും വെള്ളം പുറത്തേക്ക് തെറിക്കുന്നത് ദൃശ്യങ്ങളിൽ കാണാം. ഈ വിവരം ഗ്രാമത്തിൽ പെട്ടെന്ന് പ്രചരിക്കുകയും നിരവധി ആളുകൾ ഈ കാഴ്ച കാണാൻ എത്തുകയും ചെയ്തു. കാറ്റോ മഴയോ ഇല്ലാത്ത സാഹചര്യത്തിലും വെള്ളത്തിന്‍റെ ഉപരിതലത്തിൽ തിരമാലകൾ രൂപപ്പെടുന്നത് ആകർഷണീയമായ കാഴ്ചയായി മാറി. ഈ സംഭവത്തിന്റെ ദൃശ്യങ്ങൾ സമൂഹ മാധ്യമങ്ങളിൽ വ്യാപകമായി പങ്കുവയ്ക്കുകയും വലിയ ശ്രദ്ധ നേടുകയും ചെയ്തു.

ഈ പ്രതിഭാസത്തിന്‍റെ യഥാർത്ഥ കാരണം ഇതുവരെ കണ്ടെത്താൻ സാധിച്ചിട്ടില്ല. ഭൂഗർഭത്തിലെ ഭൗമശാസ്ത്രപരമായ മാറ്റങ്ങളോ, അല്ലെങ്കിൽ പ്രദേശത്തെ ഭൂകമ്പ സാധ്യതയുമായി ബന്ധപ്പെട്ട സ്വാഭാവിക പ്രക്രിയകളോ ഇതിന് പിന്നിൽ ഉണ്ടാകാമെന്ന് ചിലർ കരുതുന്നു, പക്ഷേ ഇതുമായി ബന്ധപ്പെട്ട ഔദ്യോഗിക സ്ഥിരീകരണം ലഭ്യമായിട്ടില്ല. ശാസ്ത്രീയ പരിശോധനകൾക്ക് ശേഷമേ ഈ സംഭവത്തിന് വ്യക്തമായ വിശദീകരണം നൽകാനാകൂവെന്ന് വിദഗ്ദർ വ്യക്തമാക്കുന്നു. സംഭവത്തിന്റെ വൈറലായതോടെ, ഇത് കൗതുകകരമായ ഒരു സംഭവമാണെന്നും, അതിന്റെ അടിസ്ഥാനത്തിൽ അഭ്യൂഹങ്ങളോ അന്ധവിശ്വാസങ്ങളോ പ്രചരിപ്പിക്കരുതെന്ന് അധികൃതർ മുന്നറിയിപ്പ് നൽകുന്നു. ജില്ലാ ഭരണകൂടം ഈ സംഭവത്തെക്കുറിച്ച് ശാസ്ത്രീയ അന്വേഷണം ആരംഭിച്ചിട്ടുണ്ട്. മഴവെള്ളം ഭൂമിക്കടിയിലേക്ക് ഇറങ്ങിച്ചെല്ലുന്നതുമൂലം അവിടെ കുടുങ്ങിക്കിടക്കുന്ന വാതകത്തിന്‍റെ മർദ്ദമായിരിക്കാമെന്ന് പ്രാഥമിക നിരീക്ഷണങ്ങൾ സൂചിപ്പിക്കുന്നു. എന്നാൽ, അടുത്തിടെ പ്രദേശത്ത് ഭൂചലനങ്ങളൊന്നും ഉണ്ടായിട്ടില്ലെന്ന് സംസ്ഥാന സീസ്‌മോളജി വകുപ്പ് വ്യക്തമാക്കുന്നു. സംഭവത്തിന്‍റെ കൃത്യമായ കാരണം കണ്ടെത്തുന്നതിനായി ഗ്രൗണ്ട് വാട്ടർ റിസർച്ച് ഇൻസ്റ്റിറ്റ്യൂട്ട് സംഘം വിശദമായ പഠനം നടത്തും. കിണറിലെ അസാധാരണ ചലനത്തിന്‍റെ യഥാർത്ഥ കാരണം കണ്ടെത്താൻ വിദഗ്ധരുടെ പരിശോധനയ്ക്കും ഔദ്യോഗിക റിപ്പോർട്ടിനും കാത്തിരിക്കുകയാണ് പ്രദേശവാസികൾ.