Battery Giant Arrives: റെഡ്‍മി നോട്ട് 17 5ജി ഇന്ത്യയിൽ എത്തി

ഷവോമി, പുതിയ ഫീച്ചറുകളും വൻ ബാറ്ററിയുമായി റെഡ്‍മി നോട്ട് 17 5ജി എന്ന സ്മാർട്ട്ഫോൺ ഇന്ത്യൻ വിപണിയിൽ അവതരിപ്പിച്ചു. 8,000mAh ബാറ്ററി, 120Hz അമോലെഡ് ഡിസ്പ്ലേ, സ്നാപ്ഡ്രാഗൺ 4 ജനറേഷൻ 4 ചിപ്‌സെറ്റ് എന്നിവയാണ് ഈ ഫോണിന്റെ പ്രധാന ആകർഷണങ്ങൾ. ചൈനയിൽ അവതരിപ്പിച്ചതിന് പിന്നാലെയാണ് ഈ സ്മാർട്ട്ഫോൺ ഇന്ത്യയിലും എത്തിയത്. റെഡ്‍മി നോട്ട് 17 5ജിയുടെ 6ജിബി റാം + 128ജിബി സ്റ്റോറേജ് വേരിയന്റിന് 27,999 രൂപയാണ് വില. 8ജിബി റാം + 128ജിബി സ്റ്റോറേജ് മോഡലിന് 30,999 രൂപ നൽകണം. എസ്‌ബിഐ, ആക്സിസ് ബാങ്ക്, കൊട്ടക് ബാങ്ക് ക്രെഡിറ്റ് കാർഡുകൾ ഉപയോഗിച്ച് വാങ്ങുന്നവർക്ക് 3,000 രൂപയുടെ ഇൻസ്റ്റന്റ് ഡിസ്കൗണ്ടും കമ്പനി പ്രഖ്യാപിച്ചിട്ടുണ്ട്. ഓഗസ്റ്റ് 12 മുതൽ ആമസോണിലും ഷവോമി ഇന്ത്യയുടെ ഔദ്യോഗിക ഓൺലൈൻ സ്റ്റോറിലുമാണ് വിൽപ്പന ആരംഭിക്കുക. ആർട്ടിക് ബ്ലൂ, ഡാർക്ക് നൈറ്റ്, സ്റ്റാർലൈറ്റ് പർപ്പിൾ എന്നീ മൂന്ന് നിറങ്ങളിൽ ഫോൺ ലഭ്യമാകും.

ആൻഡ്രോയിഡ് 16 അടിസ്ഥാനമാക്കിയുള്ള ഹൈപ്പർഒഎസ് 3-ലാണ് റെഡ്മി നോട്ട് 17 5ജി പ്രവർത്തിക്കുന്നത്. നാല് വർഷത്തെ ഓപ്പറേറ്റിങ് സിസ്റ്റം അപ്ഡേറ്റും ആറ് വർഷത്തെ സുരക്ഷാ അപ്ഡേറ്റുകളും കമ്പനി വാഗ്ദാനം ചെയ്യുന്നു. 6.9 ഇഞ്ച് ഫുൾ എച്ച്ഡി പ്ലസ് ട്രൂകളർ അമോലെഡ് ഡിസ്പ്ലേയാണ് ഫോണിൽ ഉള്ളത്. 120Hz റിഫ്രഷ് റേറ്റ്, 1,800 നിറ്റ്സ് പീക്ക് ബ്രൈറ്റ്നസ്, 100 ശതമാനം ഡി.സി.ഐ-പി3 കളർ ഗാമറ്റ്, കോർണിങ് ഗൊറില്ല ഗ്ലാസ് 7ഐ സംരക്ഷണം എന്നിവയും ഡിസ്പ്ലേയുടെ പ്രത്യേകതകളാണ്. നനഞ്ഞ കൈകളിലും മികച്ച ടച്ച് പ്രതികരണം ഉറപ്പാക്കുന്ന ഹൈഡ്രോടച്ച് 2.0 സാങ്കേതികവിദ്യയും ഫോണിലുണ്ട്.