Colorful Start to Onam Celebrations: ഗുരുദേവ സോഷ്യൽ സൊസൈറ്റി ഓണാഘോഷത്തിന് വർണ്ണാഭമായ തുടക്കം

മനാമ: സൽമാനിയ കാനു ഗാർഡനിൽ പ്രവർത്തിക്കുന്ന ഗുരുദേവ സോഷ്യൽ സൊസൈറ്റി ലേഡീസ് വിങ്ങിന്റെ നേതൃത്വത്തിൽ ഈ വർഷത്തെ ഓണാഘോഷ പരിപാടികൾ 'ജി.എസ്.എസ്. ലയം പൊന്നോണം 2026' എന്ന പേരിൽ ആരംഭിച്ചു. കഴിഞ്ഞ ദിവസം സൊസൈറ്റിയുടെ അങ്കണത്തിൽ നടന്ന ചടങ്ങിൽ മാധ്യമപ്രവർത്തകൻ പ്രദീപ് പുറവങ്കര ഭദ്രദീപം കൊളുത്തി ഉദ്ഘാടനം നടത്തി. തുടർന്ന് നടന്ന ഓണപ്പുടവ മത്സരത്തിൽ 30 ഓളം കുടുംബാംഗങ്ങൾ നാല് വിഭാഗങ്ങളായി പങ്കെടുത്തു. വിജയികൾക്ക് ക്യാഷ് അവാർഡുകൾ സമ്മാനമായി നൽകി. ഈ മത്സരത്തിൽ സോണിയ വിനു, നക്ഷത്ര ബിജു എിവർ വിധികർത്താക്കളായി പ്രവർത്തിച്ചു. നന്ദൻ അയിരൂരും സംഘവും അവതരിപ്പിച്ച വഞ്ചിപ്പാട്ട്, ഓണപ്പാട്ടുകൾ തുടങ്ങിയവ ചടങ്ങുകൾക്ക് മിഴിവേകി.

കുടുംബാംഗങ്ങളും കുട്ടികളുമായി നിറഞ്ഞ സദസ്സിൽ നടന്ന ചടങ്ങിൽ ചെയർമാൻ സനീഷ് കൂറുമുള്ളിൽ അധ്യക്ഷത വഹിച്ചു. ജി.എസ്.എസ്. ലേഡീസ് വിങ് സെക്രട്ടറി സിന്ധു റോയി സ്വാഗതവും, ലേഡീസ് വിങ് കൾച്ചറൽ സെക്രട്ടറി വിദ്യാ രാജേഷ് നന്ദിയും രേഖപ്പെടുത്തി. സൊസൈറ്റി ജനറൽ സെക്രട്ടറി ബിനുരാജ് രാജൻ, വൈസ് ചെയർമാൻ സതീഷ് കുമാർ തുടങ്ങിയവർ ആശംസകൾ നേർന്നു. ഓണപ്പുടവ മത്സരത്തിന്റെ ജനറൽ കൺവീനർ വിനീത അരുൺ, മറ്റ് ഡയറക്ടർ ബോർഡ് അംഗങ്ങൾ പരിപാടികൾ നിയന്ത്രിച്ചു.

ഓഗസ്റ്റ് 14 വെള്ളിയാഴ്ച വൈകിട്ട് 6.00 മണി മുതൽ പായസ മത്സരവും പായസമേളയും നടക്കുമെന്ന് ഭാരവാഹികൾ അറിയിച്ചു. തുടർന്ന് 21 വെള്ളിയാഴ്ച വൈകിട്ട് അത്തപ്പൂക്കള മത്സരവും സെപ്റ്റംബർ നാലിന് ജി. എസ്. എസ് ഓണസദ്യയും ഉണ്ടായിരിക്കുമെന്ന് അവർ അറിയിച്ചു. ഈ പരിപാടികൾക്ക് വലിയ പ്രതീക്ഷകളോടെ സൊസൈറ്റി അംഗങ്ങൾ ഒരുങ്ങുന്നു. ഓണാഘോഷത്തിന്റെ ആഘോഷം കുടുംബങ്ങൾക്കിടയിൽ സന്തോഷവും ഐക്യവും സൃഷ്ടിക്കുമെന്ന് പ്രതീക്ഷിക്കുന്നു.