Meta admits errors:മെറ്റ പിഴവുകൾ സമ്മതിച്ച് പരിഹാര നിർദേശങ്ങൾ സമർപ്പിക്കണം

സോഷ്യൽ മീഡിയയിലെ പ്രമുഖ കമ്പനിയായ മെറ്റ, ഇന്ത്യൻ അധികാരികളുമായി നടത്തിയ ചർച്ചയിൽ അൽഗോരിതത്തിലെ പിഴവുകൾ സമ്മതിച്ചതായി റിപ്പോർട്ടുകൾ സൂചിപ്പിക്കുന്നു. ഇലക്ട്രോണിക്‌സ് ആൻഡ് ഇൻഫർമേഷൻ ടെക്‌നോളജി മന്ത്രാലയത്തിലെ (MeitY) ഉദ്യോഗസ്ഥരുമായി നടന്ന കൂടിക്കാഴ്ചയിൽ മെറ്റ ഇക്കാര്യം തുറന്നുപറഞ്ഞതായി ഇന്ത്യ ടുഡേ റിപ്പോർട്ടിൽ പറയുന്നു. പ്രധാനമന്ത്രി നരേന്ദ്ര മോദിയുടെ ഒരു വീഡിയോ ഫെയ്‌സ്ബുക്കിൽ നിന്നും നീക്കിയതിന്റെ പശ്ചാത്തലത്തിലാണ് ഈ സമ്മതം. ഇതിന് പിന്നാലെ, മെറ്റ കേന്ദ്രസർക്കാരിനോട് മാപ്പു ചോദിക്കുകയും ചെയ്തിരുന്നു.

കൂടിക്കാഴ്ചയിൽ മെറ്റയുടെ അൽഗോരിതങ്ങൾ, പ്ലാറ്റ്ഫോമിന്റെ പ്രവർത്തനത്തെ നിയന്ത്രിക്കുന്ന സാങ്കേതിക സംവിധാനങ്ങൾ എന്നിവയെക്കുറിച്ചുള്ള ആശങ്കകൾ ചർച്ചയിലുണ്ടായിരുന്നു. കേന്ദ്ര സർക്കാർ, എല്ലാ ആശങ്കകളും വിശദമായി വ്യക്തമാക്കുകയും അവ പരിഹരിക്കുന്നതിനുള്ള ഒരു സമഗ്രമായ പദ്ധതി സമർപ്പിക്കണമെന്നും ആവശ്യപ്പെട്ടതായി റിപ്പോർട്ടുകൾ പറയുന്നു. മെറ്റയുടെ ആഗോള സാങ്കേതിക സംഘം ഇന്ത്യയിൽ കൂടുതൽ ചർച്ചകൾക്കായി തുടരാൻ സാധ്യതയുണ്ടെന്ന് ഇന്ത്യ ടുഡേ റിപ്പോർട്ടിൽ പറയുന്നു. വരും ദിവസങ്ങളിൽ ഐടി സെക്രട്ടറിയുടെ നേതൃത്വത്തിൽ കൂടുതൽ ചർച്ചകൾ നടക്കുമെന്നും ഉറപ്പുണ്ട്. പ്രശ്നങ്ങൾ പരിഹരിക്കാനുള്ള ശ്രമം ഇരുഭാഗത്തുനിന്നും ഉണ്ടാകുമെന്നു ഉന്നതവൃത്തങ്ങൾ വ്യക്തമാക്കുന്നു.