Elon Musk ends revenue sharing: ഇലോൺ മസ്‌കിന്റെ വരുമാന പങ്കിടൽ പദ്ധതി അവസാനിപ്പിച്ചു

ഇലോൺ മസ്‌കിന്റെ ഉടമസ്ഥതയിലുള്ള സാമൂഹിക മാധ്യമ പ്ലാറ്റ്ഫോമായ എക്സ്, ഉപയോക്താക്കൾക്ക് വരുമാനം നേടാൻ അനുവദിച്ചിരുന്ന ക്രിയേറ്റർ റവന്യൂ ഷെയറിങ് പദ്ധതി അവസാനിപ്പിക്കാൻ തീരുമാനിച്ചു. ഈ പദ്ധതിയിൽ ഇപ്പോഴും അർഹരായ ഉപയോക്താക്കൾക്കുള്ള അവസാന പേയ്മെന്റ് സെപ്റ്റംബർ 11ന് ലഭിക്കുമെന്ന് കമ്പനി അറിയിച്ചു. പുതിയ രജിസ്ട്രേഷനുകൾ ഓഗസ്റ്റ് 7 മുതൽ അവസാനിപ്പിച്ചതായും കമ്പനി വ്യക്തമാക്കിയിട്ടുണ്ട്. ഈ പദ്ധതിയുടെ ഭാഗമായി ഉപയോക്താക്കൾക്ക് ഉള്ളടക്കം പങ്കുവയ്ക്കുകയും അതിന് ലഭിക്കുന്ന ഇടപെടലുകളുടെ അടിസ്ഥാനത്തിൽ വരുമാനം നേടുകയും ചെയ്യാൻ അവസരം ലഭിച്ചിരുന്നു. എന്നാൽ, ഈ പദ്ധതിയിൽ പങ്കെടുക്കാൻ പ്രീമിയം എക്സ് അക്കൗണ്ട് ഉള്ളവർക്കു മാത്രമേ സാധ്യമായിരുന്നുവെന്ന് കമ്പനി വ്യക്തമാക്കി. എക്സ് ക്രിയേറ്റേഴ്സ് വിഭാഗം മേധാവി അലെഗ്ര ജാക്കിയ, പദ്ധതിയുടെ പ്രോത്സാഹന ഘടന ശരിയായ രീതിയിലായിരുന്നില്ലെന്ന് അഭിപ്രായപ്പെട്ടു. പുതിയ ഉള്ളടക്കം സൃഷ്ടിക്കുന്നതിന് പകരം, പലരും നേരത്തെ തയ്യാറാക്കിയ ഉള്ളടക്കം പുനരുപയോഗിച്ച് പണം നേടാൻ ശ്രമിച്ചതായി അവർ ചൂണ്ടിക്കാട്ടി. ഇതോടെ, പ്ലാറ്റ്ഫോമിൽ യഥാർത്ഥവും പുതിയതുമായ ഉള്ളടക്കത്തിന്റെ അളവ് കുറയുന്ന സാഹചര്യം ഉണ്ടായി. ഈ പ്രശ്നം പരിഹരിക്കാൻ, എക്സ് പുതിയ ഒറിജിനൽ കണ്ടന്റ് റിവാർഡ്സ് പദ്ധതി ആരംഭിക്കാനാണ് തീരുമാനിച്ചത്. പുതിയ പദ്ധതിയിൽ, യഥാർത്ഥവും ക്രിയാത്മകവുമായ ഉള്ളടക്കത്തിന് പ്രതിഫലം നൽകുന്നതിന് മുൻഗണന നൽകും. പഴയ റവന്യൂ ഷെയറിങ് പദ്ധതി പൂർണ്ണമായും അവസാനിക്കുന്നതിന് മുമ്പ്, നിലവിലെ ഉപയോക്താക്കൾക്ക് മൂന്ന് പേയ്മെന്റുകൾ ലഭിക്കും. ഓഗസ്റ്റ് 14നും 28നും രണ്ട് പേയ്മെന്റുകൾ ലഭിക്കും, സെപ്റ്റംബർ 7 വരെ നേടിയ വരുമാനത്തിനുള്ള അവസാന പേയ്മെന്റ് സെപ്റ്റംബർ 11ന് ലഭിക്കുമെന്ന് എക്സ് വ്യക്തമാക്കി.

ഒറിജിനൽ കണ്ടന്റ് റിവാർഡ്സ് പദ്ധതിയിലൂടെ, പ്ലാറ്റ്ഫോമിൽ പുതിയ ആശയങ്ങൾ, അറിവുകൾ, റിപ്പോർട്ടിങ്, സർഗാത്മകത, അഭിപ്രായങ്ങൾ എന്നിവ അവതരിപ്പിക്കുന്ന ക്രിയേറ്റർമാർക്ക് പ്രതിഫലം നൽകാനാണ് എക്സ് ലക്ഷ്യമിടുന്നത്. മറ്റുള്ളവരുടെ ഉള്ളടക്കം പുനഃപ്രസിദ്ധീകരിക്കുന്നതിനോ കുറഞ്ഞ പരിശ്രമത്തിൽ തയ്യാറാക്കുന്ന പോസ്റ്റുകൾ പങ്കുവയ്ക്കുന്നതിനോ പകരം, സ്വന്തം ആശയങ്ങളും കഴിവുകളും ഉപയോഗിച്ച് ഉള്ളടക്കം സൃഷ്ടിക്കുന്നവർക്കായിരിക്കും കൂടുതൽ പ്രാധാന്യം നൽകുന്നത്. പുതിയ പദ്ധതിയിൽ അർഹരായ ക്രിയേറ്റർമാർക്ക് അവരുടെ ഒറിജിനൽ ഉള്ളടക്കത്തിന് ലഭിക്കുന്ന യോഗ്യതയുള്ള ഇംപ്രഷനുകളുടെ അടിസ്ഥാനത്തിൽ വരുമാനം ലഭിക്കും. അക്കൗണ്ടും ഉള്ളടക്കവും പദ്ധതിയുടെ നിബന്ധനകൾ പാലിക്കുന്നിടത്തോളം, ഓരോ രണ്ടാഴ്ച കൂടുമ്പോഴും പേയ്മെന്റ് ലഭിക്കും. ഉപയോക്താവ് സ്വന്തം ശബ്ദം, കാഴ്ചപ്പാട്, അറിവ്, സർഗാത്മകത എന്നിവ പ്രതിഫലിപ്പിച്ച് വ്യക്തിപരമായി സൃഷ്ടിക്കുന്ന ഉള്ളടക്കത്തെയാണ് എക്സ് ഒറിജിനൽ കണ്ടന്റായി കണക്കാക്കുന്നത്. ത്രെഡ്‌സ്, വീഡിയോകൾ, മീമുകൾ, സ്വന്തം റിപ്പോർട്ടുകൾ, വിശകലനങ്ങൾ, അഭിപ്രായങ്ങൾ, പ്രതികരണങ്ങൾ, ചിത്രങ്ങൾ, ഗ്രാഫിക്സ്, ചിത്രീകരണങ്ങൾ എന്നിവ ഇതിൽ ഉൾപ്പെടുന്നു. നിലവിലുള്ള ഉള്ളടക്കത്തെ സ്വന്തം പശ്ചാത്തലം, വിശകലനം, വിവരണം, ഹാസ്യം, സർഗാത്മകമായ എഡിറ്റിങ് എന്നിവ ഉപയോഗിച്ച് കാര്യമായ രീതിയിൽ മാറ്റി അവതരിപ്പിക്കുന്ന ഉള്ളടക്കത്തിനും പദ്ധതിയിൽ അർഹത ലഭിക്കാം.